पुणे: महापालिकेच्या आरोग्य खात्यातील महिला अधिकाऱ्याला त्रास देणाऱ्या भाजप पदाधिकाऱ्याला आता पालिका आवारात नो एंट्री करण्यात आली आहे. गेली पाच महिन्यांपासून संबंधित पदाधिकाऱ्याकडून त्रास दिला जात असल्याने महिला अधिकार्‍याने महिला आयोगाकडे तक्रार केली होती. या संदर्भातील बातम्या प्रसिद्ध झाल्यानंतर पालिकेला जाग आली असून कामगार आघाडीचा पुणे शहराध्यक्ष ओंकार कदम आणि अक्षय कांबळे या दोघांना महापालिकेत पुढील आदेशापर्यंत प्रवेश बंदी घालण्यात आली आहे.
महापालिका आयुक्त नवल किशोर राम यांनी आज परिपत्रक काढले असून यामध्ये अधिकारी व कर्मचाऱ्यांचा अशा लोकांमुळे वेळ वाया जाऊन नागरिकांना नागरी सेवा देण्यात अडचणी निर्माण होत आहेत. या बाबींचे गांभीर्य लक्षात घेत प्रतिबंधात्मक उपाययोजना म्हणून महापालिका मुख्यालय तसेच पालिकेच्या अन्य कार्यालयांमध्ये पुढील आदेश होईपर्यंत ओंकार कदम आणि अक्षय कांबळे यांच्यासह घटनेत सहभागी अज्ञात व्यक्तींना प्रवेश बंदी करण्यात आली आहे.
आपल्या राजकीय पदाचा गैरवापर करत ओंकार कदमकडून महिला वैद्यकीय अधिकारी यांच्या दालनात जमावाने जावून छायाचित्रीकरण करणे, कार्यालयाचा दरवाजा बंद करणे, धमकावणे असे प्रकार गेले काही महिन्यांपासून सुरू होते. याबाबत संबधित महिला अधिकार्‍याने तत्कालीन महापालिका आयुक्त, आरोग्य विभाग प्रमुख यांच्याकडे तक्रार केली होती. त्याकडे दुर्लक्ष केले गेले. त्यानंतर संबधित अधिकार्‍याने राज्य महिला आयोगाकडे तक्रार दिली होती.
दरम्यान प्रतिबंध घालण्यात आलेल्या या दोघांनी कोणत्याही कारणांस्तव कार्यालयात प्रवेश करण्याचा प्रयत्न केल्यास, संबंधित सुरक्षा कर्मचार्‍यांनी त्वरित प्रतिबंध करून त्वरित स्थानिक पोलीस ठाण्यात तक्रार नोंदवून योग्य ती कायदेशीर कारवाई करावी, असे परिपत्रक महापालिका आयुक्त नवल किशोर राम यांनी काढले आहे.
