पुणे : पुणेकरांसाठी दिलासादायक बातमी! पंतप्रधान नरेंद्र मोदी यांच्या अध्यक्षतेखालील केंद्रीय मंत्रिमंडळाने पुणे मेट्रो रेल्वे प्रकल्प फेज-2 ला मंजुरी दिली आहे. या टप्प्यात वनाज ते चांदणी चौक (कॉरिडोर 2A) आणि रामवाडी ते वाघोली/विठ्ठलवाडी (कॉरिडोर 2B) या दोन मेट्रो मार्गांचा समावेश आहे. हे दोन्ही मार्ग विद्यमान वनाज-रामवाडी मेट्रो (फेज-1) चा विस्तार असतील.
एकूण 12.75 किमी लांबीच्या या उन्नत मार्गांमध्ये 13 स्थानकांचा समावेश आहे. बाणेर, कोथरूड, चांदणी चौक, खराडी, वाघोली यांसारख्या वेगाने वाढणाऱ्या उपनगरांना जोडणाऱ्या या मेट्रोमार्गाने पूर्व-पश्चिम पुण्याच्या जोडणीस मोठा फायदा होणार आहे. हा प्रकल्प चार वर्षांत पूर्ण करण्याचे उद्दिष्ट आहे.
या प्रकल्पासाठी अंदाजे ₹3626.24 कोटी खर्च येणार असून तो भारत सरकार, महाराष्ट्र शासन आणि आंतरराष्ट्रीय वित्तसंस्थांकडून समप्रमाणात उभारण्यात येणार आहे. हा विस्तार कॉम्प्रेहेन्सिव मोबिलिटी प्लॅन (CMP) च्या अनुषंगाने असून, सार्वजनिक वाहतुकीचा वापर वाढवणे हे मुख्य उद्दिष्ट आहे.
यामुळे IT हब, शिक्षणसंस्था, व्यापारी आणि निवासी भाग यांना मेट्रो जोडणी मिळणार असून, निगडी-कात्रज आणि हिंजवडी-डिस्ट्रिक्ट कोर्ट या लाईन्सशी ‘इंटरचेंज’ देखील होणार आहे.
या मेट्रो विस्तारामुळे मुंबई, बेंगळुरुहून येणाऱ्या आंतरशहरी बसेसना चांदणी चौक येथे थांबा मिळणार असून, वाघोली परिसरातूनही मेट्रोचा सहज उपयोग करता येणार आहे. या निर्णयामुळे पुण्याच्या वाहतूक कोंडीला दिलासा मिळेल, आणि शहराच्या सर्वांगीण विकासाला गती मिळेल.
महत्वाच्या बातम्या
-हळदीचा व्हायरल ट्रेंड: भूत-प्रेतांना घरी बोलावताय? ज्योतिष तज्ज्ञांनी नेमकं काय सांगितलं
-पुणे महापालिकेची अभय योजना नाही; मिळकतकर सवलतीची मुदत संपण्यास पाच दिवस शिल्लक
-डिलिव्हरी बॉयचा हात तोडला, तरीही पोलिसांकडून आरोपींना जामीन, नागरिकांचा संताप
-पुणे स्टेशनच्या नामांतराची मागणी, शरद पवारांच्या राष्ट्रवादीचा विरोध, आता शहरात बॅनरबाजी
