पुणे : वसंत मोरे यांनी मनसे पक्षाला राजीनामा देऊन २० दिवस उलटले आहेत. लोकसभा निवडणुकीची उमेदवारी मिळण्यासाठी वसंत मोरे यांनी महाविकास आघाडीच्या प्रमुख नेत्याच्या भेटी घेतल्या. मात्र पुणे लोकसभेची जागा ही महाविकास आघाडीने काँग्रेससाठी सोडली होती. त्यामुळे वसंत मोरे ऐवजी काँग्रेसचे कसब्याचे आमदार रवींद्र धंगेकर यांना उमेदवारी मिळाली. त्यानंतर वसंत मोरे यांंनी अपक्ष निवडणूक लढण्याची चर्चा सुरु झाली.
मराठा आंदोलन समितीच्या बैठकीतही मोरेंची उपस्थिती दिसली होती. त्यावरुनही मराठा आंदोलन समितीकडून लढण्याच्या चर्चा सुरु झाल्या. या दरम्यान मोरेंनी वंचित बहुजन आघाडीचे अध्यक्ष प्रकाश आंबेडकर यांची भेट घेतली. त्यानंतर वंचितकडून वसंत मोरे यांची पुणे लोकसभा निवडणुकीसाठी उमेदवारी जाहीर झाली आहे. त्यावर आता वसंत मोरे यांनी प्रतिक्रिया दिली आहे.
वसंत मोरेंची प्रतिक्रिया
“मला उमेदवारी मिळावी याकरिता महाविकास आघाडीच्या नेत्यांना भेटलो. पण मला काही कारणास्तव उमेदवारी मिळाली नाही. मात्र आज वंचित बहुजन आघाडीचे संस्थापक प्रकाश आंबेडकर यांनी उमेदवारी देऊन मला काम करण्याची संधी दिली. याबद्दल मी त्यांचा आभारी असून प्रकाश आंबेडकर यांना समाजातील प्रत्येक घटक मानणारा आहे. त्यामुळे या निवडणुकीत मला अधिकाधिक फायदा होईल आणि मी किमान ५५ हजारांच्या मताधिक्याने निवडून येईल .”
“मागील २५ वर्षापासून राज ठाकरे यांच्यासोबत काम करत राहिलो. त्या कालावधीत पुणे महापालिकेमध्ये ३ वेळा नगरसेवक म्हणून काम करण्याची संधी मिळाली आणि त्या संधीचं मी सोनं केलं. या १५ वर्षाच्या नगरसेवक पदाच्या काळात सत्तेमध्ये नसताना देखील कात्रज प्रभागाचा सर्वांगीण विकास केला आहे. कात्रज प्रभाग हा शहरासमोर रोल मॉडेल ठरलं आहे. माझ्याकडून प्रभागात सर्व विकास काम सुरू होती”, असंही वसंत मोरे म्हणाले आहेत.
“मुरलीधर मोहोळ आणि रविंद्र धंगेकर या दोघांसोबत मी पुणे महापालिकेमध्ये एकत्रित काम केले आहे. ते दोघे पण माझे चांगले मित्र आहेत. तसेच मी या निवडणुकीत वैयक्तिक टीका करणार नाही. तर त्यांच्या पक्षाच्या ध्येयधोरण आणि चुकीच्या कारभाराविरोधात सातत्याने भूमिका मांडत राहणार, त्याचबरोबर आजवरचं माझं काम पाहून पुणेकर नागरिक माझ्या पाठीशी उभे राहून मला विजयी करतील”, असा विश्वासही यावेळी वसंत मोरे यांनी व्यक्त केला आहे.
महत्वाच्या बातम्या-
-‘विकासकामे करणे म्हणजे एक्टिंग करण्यासारखं नाही’; आढळराव पाटलांचा कोल्हेंवर निशाणा
-Pune Lok Sabha Election | पुण्यात वसंत मोरे तर बारामतीत सुप्रिया सुळेंना राहिल पाठिंबा
-Big Breaking: अखेर तात्यांना ‘वंचित’कडून पुणे लोकसभेची उमेदवारी; मोहोळ, धंगेकरांपुढे मोठं आव्हान?
