पुणे : पुण्यातील २१ वर्षीय महिलेचा राजगड किल्ल्यावरून खाली कोसळल्याने दुर्दैवी मृत्यू झाला आहे. कोमल शिंदे (वय २१, रा. आळंदी) असे मृत महिलेचे नाव आहे. कोमल आणि तिचे पती गुरुवारी राजगडावर फिरण्यासाठी गेले होते. सायंकाळी ५ वाजण्याच्या सुमारास बालेकिल्ल्याच्या खडतर वाटेवरून कोमल सुमारे ४०० फूट खाली कोसळली. यामध्ये तिच्या डोक्याला आणि तोंडाला गंभीर जखमा झाल्या आणि जोरदार रक्तस्रावामुळे त्यांचा जागीच मृत्यू झाला.
दुपारी पडलेल्या पावसामुळे किल्ल्याच्या पायवाटा निसरड्या झाल्या होत्या. कोमल आणि तिचे पती सायंकाळी किल्ला उतरत असताना ही दुर्घटना घडली. कोमल संजीवनी आणि सुवेळा माचीच्या पायथ्याशी असलेल्या कड्यावर आपटली. खडकावर आदळल्याने तिच्या डोक्याला आणि तोंडाला गंभीर दुखापत झाली, त्यामुळे तिचा जागीच मृत्यू झाला. या घटनेची माहिती मिळताच स्थानिक कार्यकर्ते संकेत खरात आणि रामभाऊ ढेबे यांनी कोमल यांचा मृतदेह गडावरील पद्मावती माचीवरील राजसदरेच्या प्रांगणात आणला.
घटनेची माहिती मिळाल्यानंतर रेस्क्यू पथकाने तातडीने राजगड गाठला. पोलिस अंमलदार पी.एच. सुर्यवंशी, स्थानिक पोलीस पाटील विश्वास शिर्के, पुरातत्व विभागाचे पाहरेकरी बापू साबळे आणि हवेली तालुका आपत्ती व्यवस्थापन रेस्क्यू पथकाचे तानाजी भोसले यांनी रात्री उशिरा कोमल यांचा मृतदेह खाली आणला. पोलिसांनी पंचनामा करून मृतदेह शवविच्छेदनासाठी पाठवला आहे. वेल्हे पोलीस या प्रकरणाचा तपास करत असून मृत्यूचे नेमके कारण अद्याप स्पष्ट झालेले नाही.
ही घटना शिवराज्याभिषेक सोहळ्याच्या पार्श्वभूमीवर घडल्याने परिसरात हळहळ व्यक्त केली जात आहे. राजगडावरील खडतर आणि निसरड्या वाटांमुळे पर्यटकांना सावधगिरी बाळगण्याचे आवाहन करण्यात येत आहे. या दुर्घटनेने किल्ल्यावरील सुरक्षिततेच्या उपाययोजनांबाबत पुन्हा एकदा प्रश्न उपस्थित झाले आहेत.
महत्वाच्या बातम्या
-PMC: महिला अधिकाऱ्याला त्रास देणारा भाजप पदाधिकारी कोण? बड्या नेत्यासोबत उठबस, कारवाई होणार का?
-पुणेकरांनो, बकरी ईद निमित्त शहरातील हे रस्ते असणार बंद; पहा कोणते पर्यायी मार्ग
-दादांच्या कार्यकर्त्यांना हवाय साहेबांचा आशिर्वाद; पुण्यात झळकले बॅनर्स
