पुणे : पिंपरी-चिंचवड महानगरपालिका निवडणुकांच्या पार्श्वभूमीवर शहरातील विकासकामांवरून भाजप आणि राष्ट्रवादी काँग्रेसमध्ये श्रेयवादाचा वाद तीव्र झाल्याचे पहायला मिळत आहे. भोसरी मतदारसंघाचे भाजप आमदार महेश लांडगे यांनी थेट उपमुख्यमंत्री अजित पवार यांच्यावर निशाणा साधत, ‘पिंपरी-चिंचवडच्या विकासाचे श्रेय घेण्याचा प्रयत्न केला जात आहे’, असा आरोप केला आहे.
“मी पैलवान आहे, कोणाला घाबरत नाही, समोरच्याला अंगावर घ्यायची सवय आहे,” असं म्हणत महेश लांडगेंनी अजित पवारांना अप्रत्यक्षपणे आव्हान दिल्याचे दिसून येत आहे. या वादामुळे पिंपरी-चिंचवडमध्ये भाजप आणि राष्ट्रवादी काँग्रेस यांच्यातील राजकीय संघर्ष तीव्र होण्याची शक्यता आहे. महेश लांडगे आणि अजित पवारांच्या वादाचे महायुतीवर काय परिणाम होतात हे पाहणं देखील महत्वाचं आहे.
‘२०१७ मध्ये भाजपने पिंपरी-चिंचवड महानगरपालिकेत सत्ता मिळवल्यापासून शहरात अनेक विकासकामं झाली, ज्यात दिव्यांग भवनासारख्या प्रकल्पांचा समावेश आहे. गेल्या ३० वर्षांत इतरांनी काय केलं? शहराच्या विकासात अनेकांचं योगदान आहे, पण भाजपचं योगदानही नाकारता येणार नाही. नागरिकांनी आम्हाला संधी दिली नसती, तर काय केलं असतं? देवळात घंटा वाजवत बसलो असतो का?” असा टोला महेश लांडगेंनी विरोधकांना लगावला आहे.
“भाजपने पारदर्शक पद्धतीने काम केलं आहे, तर केलेल्या कामांना विरोधकांकडून भ्रष्टाचाराचं लेबल लावलं जातं. आम्ही केलं की भ्रष्टाचार आणि त्यांनी केलं की कामं, असं कसं चालेल? आपलं पाऊल डगमगणार नाही. तसेच, आपलं नावही विकासकामांमध्ये कुठेतरी नमूद व्हावं”, अशी अपेक्षा महेश लांडगेंनी व्यक्त केली आहे.
या प्रकरणात लांडगे यांनी मुख्यमंत्र्यांकडे आयुक्तांना प्रोटोकॉलमध्ये बदल करण्याची मागणी केली आहे, जेणेकरून विकासकामांचं श्रेय योग्य व्यक्तींना मिळेल. हा वाद पिंपरी-चिंचवडच्या राजकारणात नव्या चर्चेला जन्म देणारा ठरला आहे. आगामी निवडणुकांमध्ये हा श्रेयवादाचा मुद्दा राजकीय पक्षांमधील तणाव आणखी वाढवू शकतो, अशी शक्यता वर्तवली जात आहे.
महत्वाच्या बातम्या
-पिंपरी-चिंचवडच्या राजकारणात घडामोडींना वेग; लांडे, गव्हाणेंची शरद पवार गटातून हकालपट्टी
-फडणवीसांसोबत फोटो अन् ‘नेतृत्व दमदार’चा नारा; बिडकरांच्या स्टेट्समुळे भाजपमध्ये धुरळा
-धीरुभाई अंबानींबाबत केलेल्या वक्तव्यावरुन अजितदादांचं स्पष्टीकरण, म्हणाले, ‘काय बोलायचं ते…’
-माऊली…माऊली… येत्या २ दिवसांत ज्ञानोबा, तुकोबांच्या पालखीचे प्रस्थान; पालखीचं वेळापत्रक जाहीर
