पुणे : महापालिका निवडणुकीसाठी प्रभाग रचना करण्याची प्रक्रिया सुरू झाली आहे. प्रशासनाकडून निवडणुकीची तयारी केली जात असताना, दुसरीकडे राजकीय वर्तुळात देखील धुरळा उडायला सुरुवात झाली आहे. उमेदवारी मिळवण्यासाठी मोठी गर्दी झालेल्या सत्ताधारी भाजपमधील घडामोडींकडे सर्वांचे लक्ष लागले आहे. महापालिका वर्तुळात मुरलेला पैलवान म्हणून ओळखल्या जाणाऱ्या माजी सभागृह नेते गणेश बिडकर यांच्या एका व्हॉट्सॲप स्टेट्समुळे राजकीय वर्तुळात चर्चेला उधाण आलं आहे.
“पुणेकरांचं नेतृत्व दमदार, गणेश बिडकर विकासाचे शिलेदार” असा आशय आणि मुख्यमंत्री देवेंद्र फडणवीस यांच्यासोबत बिडकर यांचा फोटो असणारे हे पोस्टर खुद्द गणेश बिडकर यांनीच आपल्या स्टेटसला ठेवले आहे. कार्यकर्त्यांनी देखील लागलीच सोशल मीडियावर व्हायरल केले. त्यामुळे आगामी महापालिका निवडणुकीनंतर भाजप सत्तेत आल्यास बिडकर यांच्याकडे प्रमुख पद येणार असल्याच्या चर्चेला उधाण आलं आहे. नुकतेच शहराध्यक्ष पदाची संधी हुकल्यानंतर पक्ष नेतृत्वाने त्यांना महापालिकेच्या सत्तेतील महत्त्वाचे पद देण्याची कमिटमेंट केल्याची चर्चा आहे.
मध्यंतरी एका कार्यक्रमात कॅबिनेट मंत्री चंद्रकांत पाटील यांनी गणेश बिडकर यांच्याकडे महापालिका निवडणूक प्रमुख पदाची जबाबदारी देण्यात येणार असल्याचे सुतोवाच केले होते. याबद्दल भाजपकडून अधिकृत घोषणा झाली नसली, तरी सध्या पक्षांतर्गत सुरू असणाऱ्या घडामोडींमध्ये बिडकर यांची महत्त्वाची भूमिका दिसत आहे. महापालिका निवडणुकांमध्ये काम करण्याचा अनुभव, मतदार याद्यांपासून ते प्रभाग रचनेपर्यंत असणारा अभ्यास, ग्राउंड मॅनेजमेंटमध्ये तगडी पकड या बिडकर यांच्या जमेच्या बाजू आहेत.
2017 साली महापालिका निवडणुकीत पराभव झाल्यानंतर देखील भाजपने बिडकर यांची स्वीकृत सदस्य म्हणून निवड केली होती. यानंतर महापालिकेच्या इतिहासात पहिल्यांदाच स्वीकृत सदस्याला सभागृह नेते पद मिळाले ते बिडकर यांना. आता होऊ घातलेल्या महापालिका निवडणुकीतील पक्ष रणनीतीमध्ये देखील त्यांची महत्त्वाची भूमिका दिसत आहे. त्यामुळे भाजपाला पुन्हा सत्ता मिळाल्यास बिडकर हे महत्त्वाच्या पदावर असतील, अशी चर्चा रंगू लागली आहे. आजचे त्यांचे स्टेट्स हे याचेच द्योतक असल्याचं दिसत आहे.
महत्वाच्या बातम्या
-धीरुभाई अंबानींबाबत केलेल्या वक्तव्यावरुन अजितदादांचं स्पष्टीकरण, म्हणाले, ‘काय बोलायचं ते…’
-माऊली…माऊली… येत्या २ दिवसांत ज्ञानोबा, तुकोबांच्या पालखीचे प्रस्थान; पालखीचं वेळापत्रक जाहीर
-अल्पवयीन मुलीशी तिसऱ्या लग्नाचा घातला घाट, पहिलीने लढवली शक्कल पण….वाचा नेमकं काय झालं?
