पुणे : पुण्यातील शिवसेना (उद्धव बाळासाहेब ठाकरे) पक्षाचे नेते वसंत मोरे यांनी अलीकडेच शिवसेनेचे आमदार भरत गोगावले यांच्यावर आघोरी पूजेचा आरोप केला होता. मोरेंच्या आरोपाला भाजप नेते नितेश राणे यांनी प्रत्युत्तर दिलं आहे. “वसंत मोरे कोण?” असा सवाल उपस्थित करत त्यांना ओळखत नसल्याचं नितेश राणे म्हणाले आहेत. राणेंच्या या टीकेला मोरेंनी चांगलंच मनावर घेतलं असून, त्यांनी आता सोशल मीडियावर एक व्हिडिओ शेअर करत आपल्या राजकीय कारकीर्दीचा लेखाजोखा मांडला आहे.
काही दिवसांपूर्वी भरत गोगावले यांनी शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या पत्नी रश्मी ठाकरे यांच्यावर पक्षात फूट पडण्यास कारणीभूत असल्याचा गंभीर आरोप केला होता. या वक्तव्यानंतर ठाकरे गटाने आक्रमक पवित्रा घेतला. याच पार्श्वभूमीवर वसंत मोरे यांनी गोगावले यांनी विधानसभा निवडणुकीपूर्वी उज्जैन येथील बगलामुखी देवीच्या मंदिरात अघोरी पूजा केल्याचा दावा केला. मोरे यांनी यासंदर्भातील व्हिडिओ क्लिप्सही सोशल मीडियावर शेअर केल्या आहेत. यामध्ये नितेश राणेंनी उडी घेत मोरेंवर शरसंधाण साधलं आहे.
नितेश राणे यांनी पत्रकारांशी बोलताना वसंत मोरे यांना ओळखत नसल्याचे सांगितले. पत्रकारांनी त्यांना मोरे यांची ओळख सांगितली असता, राणे यांनी “ते आता कुठे आहेत?” असा प्रतिप्रश्न केला. यावर संतापलेल्या मोरे यांनी सोशल मीडियावर एक व्हिडिओ पोस्ट केला, ज्यामध्ये त्यांनी आपल्या राजकीय प्रवासातील महत्त्वाच्या टप्प्यांचा उल्लेख केला. व्हिडिओची सुरुवात राणेंच्या प्रश्नाने आणि शेवट राणे व मोरे यांच्या भेटीच्या दृश्याने केला आहे.
वसंत मोरे याबाबत बोलताना म्हणाले की, “साहेब आम्ही गरिब शेतकऱ्या घरची लेकरं…आम्ही राजकारणात येताना आमच्या मागे ना कुणाचा वसा होता ना कुणाचा वारसा घेऊन आम्ही जन्मलो…, आम्ही आमचं अस्तित्व स्वतःच्या हिमतीवर तयार केलं आहे. त्यामुळे आम्हाला कोणत्याही पुढाऱ्याने ओळखू दे अथवा ना ओळखू दे आमची मायबाप जनता आम्हाला ओळखते हीच आमच्या कामाची पावती…,” असे वसंत मोरे यांनी ठामपणे सांगितले आहे.
महत्वाच्या बातम्या
-पुण्याला पावसाने झोडपलं, जिल्ह्यात १०० मिलीमीटरपेक्षा अधिक पावसाची नोंद
-संत ज्ञानेश्वर महाराजांच्या पालखीतील मानाच्या अश्वांनी घेतलं श्रीमंत भाऊसाहेब रंगारी गणपतीचं दर्शन
