पुणे : पुणे महापालिकेच्या व्यायामशाळेत अनधिकृत जनसंपर्क कार्यालय सुरू करून भाजपचे शहराध्यक्ष धीरज घाटे यांनी 2012 पासून बेकायदा वीज वापरल्याचा गंभीर आरोप काँग्रेस कार्यकर्ते सागर धाडवे यांनी केला आहे. या प्रकरणी महावितरणने तक्रार प्राप्त झाल्यानंतर चौकशी केली, परंतु त्यांनी तयार केलेला अहवाल चुकीचा असून केवळ एका वर्षासाठी 95 हजार रुपयांचा दंड आकारला गेला, असे ॲड. असिम सरोदे यांनी म्हटले आहे. वीजचोरी हा फौजदारी गुन्हा असताना राजकीय दबावामुळे घाटे यांच्याविरुद्ध गुन्हा दाखल झाला नसल्याचा दावा करत सरोदे यांनी पुणे महापालिका, महावितरण आणि पुणे पोलिसांना नोटीस पाठवली आहे.
महावितरणने या प्रकरणी स्थळपाहणी करून अहवाल सादर केला, परंतु त्यात प्रत्यक्ष परिस्थिती दडवण्यात आल्याचा आरोप आहे. धाडवे यांच्या मते, व्यायामशाळेत आठ एअर कंडिशनर (एसी) आणि घाटे यांच्या कार्यालयात एक एसी बेकायदा वीज वापरून चालवले जात आहे. मात्र, महावितरणच्या अहवालात याची नोंद नसल्याने त्यांच्या कार्यपद्धतीवर प्रश्नचिन्ह उपस्थित झाले आहे. केवळ एका वर्षासाठी आकारलेला दंड हा अत्यंत कमी असून, बारा वर्षांच्या वीजचोरीकडे दुर्लक्ष करण्यात आल्याचा दावा तक्रारदारांनी केला आहे.
वीज चोरी सारख्या गंभीर प्रकरणात फौजदारी गुन्हा दाखल होणे आवश्यक असताना, तसे न झाल्याने ॲड. असिम सरोदे यांनी पुणे महापालिका, महावितरण आणि पुणे पोलिसांना नोटीस बजावली आहे. या नोटीसीद्वारे संबंधित यंत्रणांनी पारदर्शकपणे चौकशी करून योग्य कायदेशीर कारवाई करण्याची मागणी करण्यात आली आहे. या प्रकरणामुळे पुण्यातील राजकीय वर्तुळात खळबळ उडाली असून, पुढील कारवाईकडे सर्वांचे लक्ष लागले आहे.
महत्वाच्या बातम्या
-नितेश राणे म्हणाले ‘कोण वसंत मोरे?’ तात्यांनी लावला ‘तो’ व्हिडीओ
-पुण्याला पावसाने झोडपलं, जिल्ह्यात १०० मिलीमीटरपेक्षा अधिक पावसाची नोंद
-संत ज्ञानेश्वर महाराजांच्या पालखीतील मानाच्या अश्वांनी घेतलं श्रीमंत भाऊसाहेब रंगारी गणपतीचं दर्शन
