पुणे : हिंजवडी परिसरातील वीज यंत्रणेत झालेल्या बिघाडामुळे रविवारपासून (६ जुलै) खंडित झालेला वीजपुरवठा बुधवारी (९ जुलै) दुपारी साडेबाराच्या सुमारास पूर्णपणे पूर्ववत करण्यात यश आले. यामुळे सुमारे ५२ हजार घरगुती ग्राहक आणि अनेक आयटी कंपन्यांचा वीजपुरवठा पुन्हा सुरू झाला. ‘महापारेषण’ आणि ‘महावितरण’च्या संयुक्त प्रयत्नांमुळे हे शक्य झाले. रविवारी सकाळी ११ वाजता देखभाल-दुरुस्तीच्या कामासाठी वीजपुरवठा बंद करण्यात आला होता, मात्र दुपारी वीजवाहिनीत बिघाड झाल्याने उपकेंद्रातील वीजपुरवठा सुरू होऊ शकला नाही.
या बिघाडामुळे हिंजवडी आणि पेगासस उपकेंद्रातील २५ उच्चदाब वाहिन्यांचा वीजपुरवठा बंद पडला, ज्याचा परिणाम ५२ हजार घरगुती ग्राहकांसह ‘इन्फोसिस’, ‘नेक्स्ट्रा’ यांसारख्या मोठ्या आयटी कंपन्यांवर झाला. ‘महावितरण’ने तात्काळ पर्यायी मार्गाने वीजपुरवठा सुरू करण्याचे प्रयत्न केले. सोमवारी सायंकाळी चारपर्यंत बहुतांश घरगुती आणि ३५ उच्चदाब ग्राहकांचा वीजपुरवठा पर्यायी मार्गाने सुरू झाला, तर मंगळवारी उर्वरित २६ उच्चदाब ग्राहकांचा वीजपुरवठा सुरळीत करण्यात आला. याशिवाय, दहा मोठ्या आयटी उद्योगांना चक्राकार पद्धतीने प्रत्येकी पाच तास वीजपुरवठा देण्यात आला.
बुधवारी दुपारी साडेबारा वाजता बिघाड दुरुस्तीचे काम पूर्ण झाल्याने सर्व ग्राहकांचा वीजपुरवठा पूर्णपणे पूर्ववत झाला. ‘महापारेषण’ आणि ‘महावितरण’च्या अभियंत्यांनी आणि कर्मचाऱ्यांनी यासाठी सातत्याने प्रयत्न केले. या घटनेमुळे वीजपुरवठा व्यवस्थेच्या देखभाल-दुरुस्तीच्या कामाचे महत्त्व पुन्हा एकदा अधोरेखित झाले असून, भविष्यात अशा बिघाडांचा सामना करण्यासाठी अधिक प्रभावी उपाययोजना करण्याची गरज व्यक्त होत आहे.
महत्वाच्या बातम्या
-राज्यातील शेतकऱ्यांना मोठा दिलासा! राज्य सरकारचा मोठा निर्णय, आता तुकडेबंदी कायदा रद्द
-‘हे पाणी पिलं नाहीस अन् धर्म स्वीकारला नाहीस, तर…’ १९ वर्षीय विवाहितेवर धर्मांतरासाठी दबाव
-आता पिंपरी चिंचवडमध्ये पार्किंगची कटकट होणार कमी; ‘व्हॉट्सअ‍ॅप’वरुन करता येणार पार्किंग नोंदणी
-अजित पवारांच्या शिलेदाराला कृषी उत्पन्न बाजार समितीत सभापती करण्यासाठी भाजप वरिष्ठांची ताकद
