पुणे : राष्ट्रवादी काँग्रेस पक्ष अजित पवारांचा गट सध्या अनेक प्रकरणांमुळे वारंवार चर्चेत येत आहे. गतवर्षी पोर्शे कार अपघात प्रकरणात माजी आमदार सुनील टिंगरे यांचं नाव आलं, त्यानंतर बीड जिल्ह्यातील मस्साजोगचे सरपंच संतोष देशमुख हत्या प्रकरणात माजी मंत्री धनंजय मुंडे आणि वाल्मिक कराड त्यातच पुण्यात झालेल्या वैष्णवी हगवणे प्रकरणात अटकेत असलेल्या राजेंद्र हगवणेमुळे पक्षाचे नाव वारंवार टीकेचा धनी होत आहे. पुण्यातील अल्पवयीन मुलीवरील बलात्कार प्रकरणात अटकेत असलेला शंतनू कुकडे आणि त्याच्याशी आर्थिक व्यवहार असलेले माजी शहराध्यक्ष दीपक मानकर यांच्या कृत्यांमुळे पक्षाची प्रतिमा डागाळली आहे. अशातच आता आणखी घटनेची भर पडली आहे.
तुषार वाजंत्री हा राष्ट्रवादी काँग्रेसचा पदाधिकारी असून, पक्षाचे प्रदेशाध्यक्ष सुनील तटकरे यांचा निकटवर्तीय मानला जातो. त्याने डिजिटल अटकेची भीती दाखवून पुण्यातील एका ज्येष्ठ नागरिकाची ६ कोटी २९ लाख रुपयांची फसवणूक केल्याचा आरोप आहे. या प्रकरणी त्याला पनवेल येथून अटक करण्यात आली आहे. त्याला पाच दिवसांची पोलीस कोठडी सुनावण्यात आली आहे. तुषार हा विविध राज्यांमध्ये पाच सायबर गुन्ह्यांशी संबंधित असल्याचेही तपासात समोर आले आहे.
तुषार वाजंत्री याचे कुटुंबही राजकीयदृष्ट्या सक्रिय आहे. त्याचे वडील हरिश्चंद्र वाजंत्री हे राष्ट्रवादी काँग्रेसचे रोहा तालुका उपाध्यक्ष आहेत, तर त्याची पत्नी तेजस्विनी वाजंत्री कोकबेन गावची सरपंच आहे. हे कुटुंब सुनील तटकरे आणि मंत्री अदिती तटकरे यांचे निकटवर्तीय मानले जाते आणि त्यांच्या प्रचारात सक्रिय सहभागी होते. या राजकीय कनेक्शनमुळे तुषारच्या कथित गुन्ह्यांना संरक्षण मिळाले असल्याचा संशय व्यक्त होत आहे.
वाजंत्री कुटुंबाचे इतरही काही गैरव्यवहार समोर आले आहेत. बांधकाम व्यवसायात असलेले हे कुटुंब जुगाराच्या काळ्या धंद्यातही सक्रिय असल्याची माहिती आहे. रायगड जिल्ह्यात त्यांचे दोन जुगार क्लब असल्याचा दावा आहे, परंतु स्थानिकांनी तक्रारी करूनही त्यावर कोणतीही कारवाई झालेली नाही. यामुळे बड्या राजकीय नेत्यांच्या आशीर्वादाने हे कुटुंब आपले गैरकृत्ये करत असल्याचा प्रश्न निर्माण होत आहे.
महत्वाच्या बातम्या
-वैष्णवीच्या वडिलांना २ कोटी मागायला लावणारा ‘तो’ बांधकाम व्यावसायिक कोण?
