पुणे : सहकार विभागाच्या लिक्विडेटरने सहकारी संस्थेच्या सभासदांकडून तब्बल ८ कोटी रुपयांची लाच मागितली. शेअर सर्टिफिकेट देण्यासाठी ३ कोटी आणि संस्थेची जागा विकण्यासाठी आणखी ५ कोटी अशी ही प्रचंड मागणी होती. पहिला हप्ता म्हणून ३० लाख रुपये स्वीकारताना लिक्विडेटर विनोद देशमुख आणि ऑडिटर भास्कर पोळ यांना लाचलुचपत प्रतिबंधक विभागाने (ACB) शनिवार पेठेत रंगे हात पकडले.
धनकवडी येथील एकता सहकारी संस्था २००५ साली स्थापन झाली होती. ३२ सभासद असलेल्या या संस्थेची पुण्यात मौल्यवान जागा आहे. २०२० मध्ये सभासदांमध्ये वाद झाल्याने प्रकरण सहकार विभागाकडे गेले आणि २०२४ मध्ये विनोद देशमुख यांची लिक्विडेटर म्हणून नेमणूक झाली. नेमणुकीनंतर त्यांनी सभासदांना थेट लाचेची मागणी केली. सभासदांनी ५ डिसेंबर २०२५ रोजी पुणे ACB कडे तक्रार नोंदवली. प्रथम पडताळणीत लाचेची मागणी खरी असल्याचे सिद्ध झाले. तडजोडीअंती ३० लाख रुपये अॅडव्हान्स देण्याचे ठरले. शनिवार पेठेतील तक्रारदारांच्या कार्यालयासमोर ACB ने सापळा रचला आणि पंचांसमोर पैसे स्वीकारताच दोघांना अटक केली.
ACB अधीक्षक शिरीष सरदेशपांडे यांच्या मार्गदर्शनाखाली ही कारवाई पार पडली. सहकारी संस्थांच्या लिक्विडेशन प्रक्रियेत एवढ्या मोठ्या रकमेची लाच मागितल्याची ही पुणे विभागातील पहिलीच घटना मानली जात आहे. दोन्ही आरोपींची चौकशी सुरू असून पुढील तपासात आणखी काही धक्कादायक बाबी समोर येण्याची शक्यता आहे. ही कारवाई पुन्हा एकदा सहकार विभागातील भ्रष्टाचारावर प्रकाश टाकते. सभासदांनी हिम्मत दाखवल्याने ACB ला मोठे यश मिळाले असले तरी लिक्विडेटरच्या रूपात नेमलेला अधिकारीच लाच मागत असल्याने सहकार खात्याची प्रतिमा मलीन झाली आहे.
महत्वाच्या बातम्या-
-कमला नेहरू रुग्णालयाला नवजीवन; २५ तज्ज्ञ डॉक्टर, अडीच लाखांपर्यंत पगार, ४२ कोटींची दुरुस्ती!
-नगरपालिका-नगरपंचायत मतदान: पुणे जिल्ह्यात दुपारी दीडपर्यंत ३५.६९%; निकाल २१ डिसेंबरलाच!
-पुण्यातील सभेत अजित पवारांचा मुख्यमंत्री म्हणून उल्लेख, अजितदादा म्हणाले, ‘मला मुख्यमंत्री…’
-चौदावा जनता दरबार यशस्वी; मुरलीधर मोहोळ यांचा “एक छत, एक तक्रार, एक निराकरण” उपक्रम चर्चेत!
