पुणे : आगामी पुणे महानगरपालिका निवडणुकीच्या पार्श्वभूमीवर एकनाथ शिंदे यांच्या नेतृत्वाखालील शिवसेनेने जोरदार तयारी सुरू केली आहे. माजी आमदार आणि पुणे महानगर प्रमुख रवींद्र धंगेकर यांनी या निवडणुकीत विजय मिळवण्यासाठी एक खास मास्टरप्लॅन तयार केला आहे. हा मास्टरप्लॅन शनिवारी उपमुख्यमंत्री एकनाथ शिंदेंसमोर सादर केला जाणार आहे. या बैठकीत पुणे महापालिकेवर ताबा मिळवण्यासाठी शिंदे गटाची रणनीती ठरणार असून, याकडे सर्वांचे लक्ष लागले आहे.
या बैठकीला पुण्यातील काही निवडक पदाधिकारी उपस्थित राहणार असून, मुख्यमंत्री एकनाथ शिंदे स्वतः यात सहभागी होणार आहेत. काँग्रेसमधून शिंदे गटात दाखल झालेले रवींद्र धंगेकर यांच्यावर पुणे महानगर प्रमुखाची जबाबदारी सोपवण्यात आली आहे. त्यांना आगामी निवडणुकीसाठी रणनीती आखण्याच्या सूचना देण्यात आल्या आहेत. धंगेकर यांनी निवडणुकीत मोठ्या प्रमाणात जागा जिंकून शिंदे गटाला किंगमेकरच्या भूमिकेत आणण्याचे नियोजन केले आहे. यासाठी त्यांनी इच्छुक नेत्यांशी संपर्क साधण्यास सुरुवात केली आहे.
धंगेकर यांच्याकडून ज्या नेत्यांना आपापल्या पक्षातून तिकीट मिळण्याची शक्यता कमी आहे, अशा नेत्यांना पक्षात सामावून घेण्याचा प्रयत्न केला जात आहे. अनेक नेत्यांना पक्षप्रवेशाची ऑफर देण्यात आल्याची चर्चा आहे. प्रभाग रचनेबाबत स्पष्टता आणि पक्षातून तिकीट मिळण्याची हमी याबाबत इच्छुक उमेदवारांशी चर्चा सुरू आहे. या सर्व मुद्यांवर शिंदे यांच्यासोबत सविस्तर विचारविनिमय होणार आहे, असे सांगितले जात आहे.
या बैठकीत महापालिका निवडणुकीसाठी मास्टरप्लॅन, शिवसेना (ठाकरे गट) आणि मनसे युती झाल्यास शिंदे गटाची रणनीती, स्वबळावर लढण्याचा की युतीचा पर्याय निवडण्याचा निर्णय, पक्षप्रवेशाची तयारी आणि मुंबई-ठाण्यातील भाजप-शिवसेना युतीचा पुण्यातील परिणाम यासारख्या मुद्यांवर चर्चा होण्याची शक्यता आहे. या बैठकीतून शिंदे गटाची पुणे महापालिका निवडणुकीतील राजकीय दिशा स्पष्ट होईल. विशेषतः पक्ष स्वबळावर लढणार की युती करणार, याबाबतचा निर्णय महत्त्वाचा ठरणार आहे.
महत्वाच्या बातम्या
-चंद्रकांत पाटलांचा संताप्रती कृतज्ञता सोहळा, वारीला जाणाऱ्या वैष्णवांसाठी उपयुक्त साहित्य वाटप
-पुणे पोलीस दलात खळबळ; पोलीस कर्मचाऱ्याने उचललं टोकाचं पाऊल, नेमकं कारण काय?
-…म्हणून माझ्या चेहऱ्यावर निवडणूक आपण लढविणार आहोत; अजितदादांनी दिले स्वबळावर लढण्याचे संकेत
-बुधवार पेठेत वेश्या व्यवसाय करणाऱ्या महिलेने हातउसने पैसे परत केले नाहीत म्हणून त्याने थेट…
