पुणे : पुणे शहरात गेल्या अनेक दिवसांपासून गुन्हेगारीचे प्रमाण वाढत आहे. आंदेकर टोळी, मारणे टोळी तसेच घायवळ टोळी शहरात दहशत माजवत असते. शहरातील गणेश पेठेतील मच्छी मार्केटमध्ये दुकान चालवणाऱ्या एका व्यापाऱ्याकडून गेल्या आठ वर्षांपासून दरमहा ५० हजार रुपये हप्ता वसूल केला जात होता. या काळात सुमारे ४८ लाख रुपये खंडणी गोळा केल्यानंतरही एकदा हप्ता न दिल्याने आंदेकर टोळीने व्यापाऱ्याच्या दुकानातील ९० हजार रुपयांचे साहित्य बाहेर फेकून दिले. इतकेच नव्हे, तर हे साहित्य जबरदस्तीने टेम्पोमध्ये भरून नेण्यात आले. या प्रकरणी पोलिसांनी आंदेकर टोळीतील दोन जणांना अटक केली आहे.
अटक करण्यात आलेले आरोपी आहेत शिवम उदयकांत आंदेकर (वय ३०, रा. अशोक चौक, नाना पेठ) आणि आकाश परदेशी (वय ३०, रा. लोहियानगर). शिवम हा माजी नगरसेवक उदयकांत आंदेकर यांचा मुलगा असून, तो आंदेकर टोळीचा सक्रिय सदस्य आहे. त्याच्यावर खंडणी, मारामारी आणि धमकावणे यासारखे अनेक गंभीर गुन्हे दाखल आहेत. २०२० मध्ये शिवमला तडीपार करण्यात आले होते. तडीपारीनंतर शहरात परतल्यानंतर त्याने पोलिसांशी वाद घालत शिवीगाळ आणि धक्काबुक्की केली होती, ज्यामुळे २०२१ मध्ये त्याच्यासह पाच जणांना अटक झाली होती.
या प्रकरणी ४० वर्षीय व्यापाऱ्याने फरासखाना पोलीस ठाण्यात तक्रार दाखल केली आहे. त्यानुसार पोलिसांनी शिवम आंदेकर, आकाश परदेशी आणि इतर चार ते पाच गुंडांविरुद्ध दरोड्याचा गुन्हा नोंदवला आहे. तक्रारीनुसार, २०१६ पासून शिवमने व्यापाऱ्याला जीवे मारण्याची धमकी देऊन दरमहा ५० हजार रुपये हप्त्याची मागणी केली. आकाश परदेशी गेल्या आठ वर्षांपासून हा हप्ता गोळा करत होता, ज्यामध्ये ऑनलाइन पद्धतीनेही पैसे वसूल केले गेले.
पोलिसांनी दिलेल्या माहितीनुसार, व्यापाऱ्याने एकदा हप्ता देण्यास नकार दिल्याने मे महिन्यात आंदेकर टोळीने दुकानातील साहित्य बाहेर फेकले. या साहित्याची किंमत ९० हजार रुपये होती. टोळीने हे साहित्य टेम्पोमध्ये भरून नेले. पोलिसांनी तपास सुरू केला असून, अटक केलेल्या दोघांवर कठोर कारवाई करण्यात येणार आहे. या घटनेमुळे गणेश पेठेतील व्यापारी वर्गात भीतीचे वातावरण पसरले आहे.
महत्वाच्या बातम्या
-पालिका निवडणुकीसाठी शिंदेंचा ‘मास्टर प्लॅन’ रेडी; शनिवारी बोलवली महत्वाची बैठक
-चंद्रकांत पाटलांचा संताप्रती कृतज्ञता सोहळा, वारीला जाणाऱ्या वैष्णवांसाठी उपयुक्त साहित्य वाटप
-पुणे पोलीस दलात खळबळ; पोलीस कर्मचाऱ्याने उचललं टोकाचं पाऊल, नेमकं कारण काय?
-…म्हणून माझ्या चेहऱ्यावर निवडणूक आपण लढविणार आहोत; अजितदादांनी दिले स्वबळावर लढण्याचे संकेत
-बुधवार पेठेत वेश्या व्यवसाय करणाऱ्या महिलेने हातउसने पैसे परत केले नाहीत म्हणून त्याने थेट…
