पुणे : वैष्णवी हगवणे आत्महत्या प्रकरणात तीन आरोपींना न्यायालयीन कोठडी सुनावण्यात आली आहे, तर राजेंद्र हगवणे आणि सुशील यांना पोलीस कोठडीत ठेवण्यात आले आहे. या प्रकरणी युक्तीवादात बोलताना हगवणे कुटुंबीयांनी वैष्णवीच्या व्हॉट्सअॅप चॅटचा आधार घेत तिच्या चारित्र्यावर प्रश्न उपस्थित केले. यानंतर, आरोपींचे वकील विपुल दुशिंग यांनी माध्यमांशी बोलताना केलेल्या वक्तव्याने वाद निर्माण झाला. त्यांनी, “एखाद्या नवऱ्याने पत्नीला चार कानशिलाट मारल्या म्हणजे तो छळ होत नाही,” असे वादग्रस्त वक्तव्य केले. या वक्तव्यावरून राज्यभरात संताप व्यक्त होत आहे.
राज्य महिला आयोगाने या वक्तव्याची गंभीर दखल घेतली असून, बार कौन्सिल ऑफ महाराष्ट्र आणि गोवा यांना पत्र लिहून वकिलांचे वर्तन ॲडव्होकेट्स कायदा, 1961 च्या तरतुदींचे उल्लंघन करणारे असल्याचे म्हटले आहे. संवेदनशील प्रकरणांमध्ये वकिलांनी माध्यमांशी बोलताना काळजी घेणे आवश्यक आहे, असे आयोगाने नमूद केले. तसेच, अशा प्रकरणांमध्ये वकिलांसाठी स्पष्ट नियमावली तयार करण्याची सूचना आयोगाने केली आहे, जेणेकरून भविष्यात अशा घटना टाळता येतील.
महिला आयोगाच्या पत्रात काय म्हटले आहे?
पुण्यातील मयत विवाहिता वैष्णवी हगवणे हिचा सासरकडून हुंड्यासाठी होणारा छळ आणि मृत्यू या अतिशय संवेदनशील विषयाबाबत न्यायालयीन प्रक्रिया सुरू आहे. असे असताना आरोपीच्या अधिवक्त्यांकडून माध्यमांत मयत वैष्णवीच्या वैयक्तिक आयुष्याबाबत आरोप केले जात आहेत. आपणांस जे काही सादर करायचे बाहे ते आपण मा. न्यायालयात पुराव्यानिशी सादर करावे. आपल्या वक्तव्यामुळे पीडितेची प्रतिमा मलीन होते आहे, त्यामुळे तिच्या कुटुंबियांना मानसिक, भावनिक त्रासाला सामोरे जावे लागत आहे, असे महिला आयोगाने दिलेल्या पत्रात म्हटलं आहे.
‘समाज म्हणून वैष्णवी हगवणे हिला आणि तिच्या कुटुंबीयांना न्याय मिळण्यासाठी आपण त्यांच्या पाठीशी उभे राहणे गरजेचे आहे. न्याय मिळण्याच्या प्रक्रियेदरम्यान माध्यमातून होणारे असे चारिम्यहनन पूर्णपणे चुकीचे असून त्यांचे मनोबल खच्ची करणारे आहे. अधिवक्त्यांनी समाजातील एक जबाबदार घटक म्हणून अधिक सजग राहून पीडितेच्या प्रतिष्ठेची व गोपनीयतेची काळजी घेणे अपेक्षित आहे. भविष्यात अशा प्रकारांना आळा बसावा, यासाठी आपल्या माध्यमातून याचा गांभीर्याने विचार व्हावा आणि महाअधिवक्त्यांसाठी सुस्पष्ट व नीतीसंगत नियमावली ठरवावी’, अशी सूचना महिला आयोगाने बार कौन्सिल ऑफ महाराष्ट्र आणि गोवा यांना दिल्या आहेत.
महत्वाच्या बातम्या
-हगवणेंचा आणखी एक धक्कादायक प्रताप उघड: ‘त्या’ प्रकरणी पोलिसांना फसवलं, नेमका काय प्रकार?
-वैष्णवीच्या वडिलांची मागणी, सरकारने घेतला मोठा निर्णय; नेमकं काय घडलं?
-वैष्णवी हगवणे: गृहविभागाकडून मोठी कारवाई; थेट ‘त्या’ IPS अधिकाऱ्याचा पदभारच घेतला काढून
-वैष्णवी हगवणे प्रकरण: “हॅलो, निलेशला पकडलंय गाडीच्या डिक्कीत डांबलाय..” नेमकं प्रकरण काय?
