पुणे : पुणे महानगरपालिका निवडणुकीच्या पार्श्वभूमीवर पुण्यात राजकीय वातावरण तापले असून कुख्यात गुंड बंडू आंदेकर कुटुंबातील दोन महिलांनी थेट निवडणूक रिंगणात उडी घेतल्याने मोठी खळबळ उडाली आहे. स्वतःच्या नातवाच्या खूनाच्या आरोपाखाली सध्या तुरुंगात असलेल्या बंडू आंदेकर यांच्या परिवाराकडून लक्ष्मी आंदेकर तसेच दिवंगत नगरसेवक वनराज आंदेकर यांच्या पत्नी सोनाली आंदेकर यांनी प्रभाग क्रमांक २३ मधून उमेदवारी अर्ज दाखल केला आहे. आज दोघींनीही कडेकोट पोलीस बंदोबस्तात भवानी पेठ क्षेत्रीय कार्यालयात अर्ज दाखल केले.
या दोन्ही महिलांना राष्ट्रवादी काँग्रेस (अजित पवार गट) कडून उमेदवारी देण्यात आल्याची जोरदार चर्चा राजकीय वर्तुळात सुरू आहे. मात्र गुन्हेगारी पार्श्वभूमी असलेल्या परिवाराला थेट राष्ट्रवादीच्या नावाने उमेदवारी दिल्यास टीकेचा भडिमार होऊ शकतो, याची पूर्ण जाणीव ठेवत उपमुख्यमंत्री अजित पवार यांनी एक ‘मोठी आणि चतुर खेळी’ केल्याची माहिती पक्षातील उच्चपदस्थ सूत्रांकडून मिळत आहे.
या खेळीनुसार प्रभाग क्रमांक २३ मधील या जागा मित्र पक्ष रिपब्लिकन पार्टी ऑफ इंडिया (खरात गट) यांना सोडण्यात येणार आहेत. अधिकृतपणे उमेदवार खरात गटाचे असतील, मात्र निवडणूक चिन्ह मात्र राष्ट्रवादी काँग्रेसचे ‘घड्याळ’ असणार आहे. त्यामुळे टीकेपासून अंतर ठेवत मतांची गणिते आपल्या बाजूने वळवण्याचा प्रयत्न अजित पवार गटाकडून होत असल्याचे बोलले जात आहे.
विशेष म्हणजे २०१७ साली भाजपने हाच फॉर्म्युला रिपब्लिकन पार्टी ऑफ इंडिया (आठवले गट) सोबत वापरला होता. तेव्हा आरपीआयचे उमेदवार भाजपच्या ‘कमळ’ चिन्हावर निवडणूक लढले होते. आता त्याच धर्तीवर राष्ट्रवादीनेही ‘मित्र पक्ष – आपले चिन्ह’ हा प्रयोग राबवल्याचे चित्र आहे.
दरम्यान, गुन्हेगारी पार्श्वभूमी असलेल्या परिवाराला अप्रत्यक्षपणे उमेदवारी देण्यात आल्याने राष्ट्रवादी काँग्रेस अजित पवार गटावर विरोधकांकडून जोरदार टीका होण्याची शक्यता व्यक्त केली जात आहे. भवानी पेठेत घडलेली ही घडामोड पुण्याच्या राजकारणात मोठा वादंग निर्माण करणार, हे मात्र निश्चित मानले जात आहे.
महत्वाच्या बातम्या-
-पुणे महापालिकेसाठी महायुती फिक्स? मुंबईत फडणवीस–सामंतांची बैठक, गणेश बिडकरांची पोस्ट चर्चेत
-ठाकरे सेना-मनसे युतीत पुणे महापालिकेसाठी फॉर्म्युला ठरला; जागावाटप जवळपास निश्चित!
-राजीनाम्यानंतर प्रशांत जगताप काँग्रेसचा हात धरणार? पुण्याचं राजकीय समीकरण बदलणार
-पुणे महापालिका निवडणूक: भाजपविरोधात ‘मेगा आघाडी’ची जोरदार तयारी; जागावाटपांत दोन्ही शिवसेनेची परवड!
-गणेश बीडकरांचा स्तुत्य उपक्रम; महा ई-सेवा केंद्रातून २७ हजार नागरिकांना शासकीय योजनांचा थेट लाभ
