बारामती : राज्याचे दिवंगत उपमुख्यमंत्री अजित पवार यांच्या जयंतीनिमित्त आज राज्यभरात राष्ट्रवादी काँग्रेसच्या वतीने विविध सामाजिक आणि स्मृती कार्यक्रमांचे आयोजन करण्यात आले आहे. या निमित्ताने पवार कुटुंबीयांनी अजितदादांच्या आठवणींना उजाळा देत अत्यंत भावूक वातावरणात त्यांना आदरांजली अर्पण केली. काल मध्यरात्री अजित पवार यांच्या पत्नी आणि उपमुख्यमंत्री सुनेत्रा पवार यांनी बारामती येथील विद्या प्रतिष्ठान येथे जाऊन अजितदादांच्या स्मृतीस्थळाचे दर्शन घेतले. त्यानंतर आज बुधवारी सकाळी संपूर्ण पवार कुटुंबीय बारामतीमध्ये एकत्र आले होते.
बुधवारी सकाळी सुनेत्रा पवार, पार्थ पवार, जय पवार, ऋतुजा पाटील आणि विजया पाटील यांनी गोजुबावी गावातील त्या दुर्दैवी धावपट्टीजवळ जाऊन अजितदादांच्या स्मृतीस विनम्र अभिवादन केले, जिथे अजित पवारांचे विमान कोसळले होते. संपूर्ण कुटुंबीयांनी त्या ठिकाणी फुले वाहून अजितदादांना श्रद्धांजली वाहिली. या प्रसंगी अजितदादांच्या आठवणीने सुनेत्रा पवार यांचा चेहरा रडवेला झाला होता आणि उपस्थित सर्वच जण गहिवरले होते. या वेळी संपूर्ण परिसरात अत्यंत सुन्न आणि भावूक वातावरण पाहायला मिळाले.
उल्लेखनीय आहे की, राज्याचे उपमुख्यमंत्री असताना २८ जानेवारी रोजी जिल्हा परिषद निवडणुकांच्या प्रचारासाठी बारामतीकडे येत असताना अजित पवार यांच्या चार्टर्ड विमानाला बारामती विमानतळाजवळ असलेल्या गोजुबावी गावाच्या हद्दीत भीषण अपघात झाला होता. धावपट्टीवर विमान कोसळून झालेल्या प्रचंड स्फोटात अजित पवार यांच्यासह वैमानिक, केबिन क्रू आणि त्यांच्या अंगरक्षकाचा दुर्दैवी मृत्यू झाला होता. या दुर्घटनेबाबत सुरुवातीला घातपाताच्या शंका व्यक्त केल्या गेल्या होत्या, मात्र आतापर्यंतच्या चौकशीत तसे कोणतेही ठोस पुरावे समोर आलेले नाहीत.
