पुणे : सिंहगड रस्ता परिसरातील स्वर्णाक्ष ढोल-ताशा ध्वज पथकाच्या गणेशोत्सव २०२६ निमित्त सराव शुभारंभ व वाद्यपूजन सोहळा मा. मुरलीधर मोहोळ यांच्या प्रमुख उपस्थितीत उत्साहपूर्ण वातावरणात संपन्न झाला. यावेळी बोलताना उपस्थित मान्यवरांनी गणेशोत्सव हा केवळ धार्मिक उत्सव नसून पुण्याच्या सांस्कृतिक अस्मितेचा, शिस्तीचा, परंपरेचा आणि सामाजिक ऐक्याचा उत्सव असल्याचे सांगितले. ढोल-ताशांचा गजर ही पुण्याची सांस्कृतिक ओळख असून, त्यातून युवकांमध्ये शिस्त, समर्पण, संघभावना आणि संस्कृतीप्रती असलेली निष्ठा वृद्धिंगत होत असल्याचे त्यांनी नमूद केले.
या प्रसंगी आमदार हेमंत रासने, आमदार भीमराव तापकीर, महापौर मंजुषा नागपुरे, नगरसेवक सचिन मोरे, नगरसेवक प्रसन्न जगताप, नगरसेवक सुनील पांडे, नातूबाग मंडळाचे अमित कंक, ढोल-ताशा महासंघाचे उपाध्यक्ष शिरीष थिटे, मानाच्या पहिल्या कसबा गणपती मंडळाचे निलेश वकील, सिने अभिनेते रमेश परदेशी तसेच अमय खाडीलकर यांची प्रमुख उपस्थिती लाभली.
कार्यक्रमादरम्यान स्वर्णाक्ष ढोल-ताशा ध्वज पथकाच्या २०२५-२६ या वर्षाच्या कार्यअहवालाचे अनावरण मुरलीधर मोहोळ यांच्या हस्ते करण्यात आले. पथकाच्या वर्षभरातील सामाजिक, सांस्कृतिक आणि संघटनात्मक कार्याचा आढावा या कार्यअहवालातून मांडण्यात आला. पथकाचे सचिव प्रणव गंजीवाले यांनी उपस्थित मान्यवरांचे स्वागत करून पथकाची वाटचाल व आगामी उपक्रमांची माहिती दिली. पथकाचे अध्यक्ष श्री. मयुरेश कोद्रे यांच्या नेतृत्वाखाली सर्व वादकांनी अत्यंत शिस्तबद्ध आणि आकर्षक वादन सादर करत पुण्याच्या समृद्ध ढोल-ताशा परंपरेचा देखणा आविष्कार घडविला.
कार्यक्रमातील आणखी एक विशेष आकर्षण म्हणजे महापौर मंजुषा नागपुरे यांनी स्वतः ढोल वादन करत पथकातील वादकांसमवेत वादनाचा आनंद घेतला. त्यांच्या सहभागामुळे उपस्थितांमध्ये उत्साहाचे वातावरण निर्माण झाले. आगामी गणेशोत्सवासाठी स्वर्णाक्ष ढोल-ताशा ध्वज पथक सज्ज असून, शिस्त, संस्कार, परंपरा आणि उत्कृष्ट वादनाच्या बळावर यंदाही पुणेकरांसमोर दिमाखदार सादरीकरण करण्याचा पथकाचा निर्धार असल्याचे यावेळी सांगण्यात आले.
