पुणे : महाराष्ट्राचे दिवंगत उपमुख्यमंत्री दिवंगत अजितदादा पवार यांच्या जयंतीनिमित्त पुणे महानगरपालिकेच्या वतीने शहरात ‘स्वच्छ सप्ताह’ साजरा करण्यात येत आहे. या अभियानाच्या नियोजनासाठी औंध क्षेत्रीय कार्यालयांतर्गत येणाऱ्या सुमारे १००० सफाई कर्मचाऱ्यांची एक विशेष बैठक औंध येथील पंडित भीमसेन जोशी सभागृहात आयोजित करण्यात आली होती. मात्र, या बैठकीला तब्बल १००० पैकी अवघे २५० कर्मचारी उपस्थित राहिल्याने भाजप नगरसेवक सनी निम्हण यांनी संताप व्यक्त केला आहे. “सफाई कर्मचाऱ्यांच्या ‘मानसिकतेची सफाई’ कधी होणार?” असा थेट सवाल उपस्थित करत त्यांनी महापालिका कामगारांच्या कर्तव्याप्रती असलेल्या भयंकर अनास्थेवर सोशल मीडिया पोस्टद्वारे जोरदार प्रहार केला आहे.
खाजगी क्षेत्रातील मॉल्स, हॉस्पिटल्स आणि कॉर्पोरेट ऑफिसमध्ये तुटपुंज्या वेतनावर काम करणारे कामगार अत्यंत प्रोफेशनली आणि तत्परतेने स्वच्छता राखतात, याकडे लक्ष वेधत निम्हण यांनी महापालिकेच्या कारभारावर बोट ठेवले. पालिका कर्मचाऱ्यांना खाजगी कामगारांपेक्षा अधिक वेतन आणि सर्व शासकीय सुविधा मिळूनही त्यांच्याकडून निम्मे काम देखील होत नाही, अशी खंत त्यांनी व्यक्त केली. हा प्रकार रोखण्यासाठी कर्मचाऱ्यांच्या हजेरीसाठी ‘थम्ब एंट्री’ तसेच प्रत्यक्ष कामाच्या पारदर्शकतेसाठी जिओ-मॅपिंग, जिओ-टॅगिंग, जीपीएस, एआय तंत्रज्ञान आणि डिजिटल कमांड सेंटरची तात्काळ उभारणी करण्याची मागणी त्यांनी प्रशासनाकडे केली आहे.
अनेक होतकरू कामगार प्रामाणिकपणे काम करण्यास तयार असताना, दुसरीकडे वर्षानुवर्षे काम न करता जागा अडवणाऱ्यांवर प्रशासनाचे कसलेही नियंत्रण उरलेले नाही, अशी टीका त्यांनी केली. नागरिकांच्या कररूपी पैशातून सार्वजनिक स्वच्छतेची चोख व्यवस्था मिळणे हा त्यांचा हक्क आहे. त्यामुळे महापालिका प्रशासनाने या गंभीर परिस्थितीची तात्काळ दखल घेऊन कामगारांच्या या उदासीन मानसिकतेवर तातडीने कारवाई करावी; अन्यथा रस्त्यावर उतरून तीव्र आंदोलन छेडले जाईल, असा इशारा नगरसेवक सनी निम्हण यांनी दिला आहे.
