पुणे : आज राज्याचे उपमुख्यमंत्री आणि पुण्याचे पालकमंत्री अजित पवार हे पुणे दौऱ्यावर आहेत. या दरम्यान पुणे मॉडेल स्कूल आणि मॉडेल प्राथमिक आरोग्य केंद्राच्या लोकार्पण सोहळ्याला त्यांनी हजेरी लावली. या कार्यक्रमात अजित पवार भाषण करण्यासाठी येताच उपस्थितांपैकी अमरावतीच्या शेतकऱ्यांची घोषणाबाजी केल्याचे पहायला मिळाले. माजी मंत्री आणि प्रहार संघटनेचे अध्यक्ष बच्चू कडू गेल्या सात दिवसांपासून विविध मागण्यांसाठी अन्नत्याग आंदोलन करत आहेत. या आंदोलनामुळे त्यांची प्रकृती सातत्याने खालावत असून, त्यांना तातडीने रुग्णालयात दाखल करण्याची गरज आहे.
अमरावतीतील तिवसा येथील वैद्यकीय अधीक्षक डॉ. शिवराज माने यांनी तहसीलदारांना पत्र लिहून कडू यांची प्रकृती गंभीर असल्याचे नमूद केले आहे. त्यांना वेळीच वैद्यकीय उपचार न मिळाल्यास त्यांच्या जीवाला धोका निर्माण होऊ शकतो, असा इशारा डॉ. माने यांनी दिला आहे. बच्चू कडूंच्या या आंदोलनाचे पडसाद आज पुण्यातही उमटले. उपमुख्यमंत्री अजित पवार यांच्या पुणे दौऱ्यादरम्यान आयोजित एका कार्यक्रमात प्रहार संघटनेच्या कार्यकर्त्यांनी गोंधळ घातला. अजित पवार यांचे भाषण सुरू होताच अमरावतीतील शेतकऱ्यांनी आणि कार्यकर्त्यांनी घोषणाबाजी सुरू केली.
यावेळी शेतकऱ्यांच्या कर्जमाफीच्या मागणीसह बच्चू कडूंच्या आंदोलनाला पाठिंबा देण्यासाठी कार्यकर्त्यांनी “बच्चू कडूंना न्याय द्या” अशा घोषणा दिल्या. यामुळे कार्यक्रमस्थळी तणाव निर्माण झाला. विशेषतः महिला कार्यकर्त्यांनी आक्रमक पवित्रा घेतल्याचे दिसून आले.
प्रहार संघटनेच्या कार्यकर्त्यांनी अजित पवार यांच्या कार्यक्रमात व्यत्यय आणण्याचा प्रयत्न केला. बच्चू कडूंच्या मागण्या सरकारने तातडीने मान्य कराव्यात, अशी मागणी यावेळी करण्यात आली. या गोंधळानंतर पोलिसांनी घोषणाबाजी करणाऱ्या कार्यकर्त्यांना ताब्यात घेतले. कार्यक्रमस्थळी काही काळ गोंधळाचे वातावरण निर्माण झाले होते. बच्चू कडू यांचे अन्नत्याग आंदोलन आज सातव्या दिवसात आहे. त्यांच्या बिघडत्या प्रकृतीमुळे कार्यकर्त्यांमध्ये अस्वस्थता पसरली आहे. सरकारने त्यांच्या मागण्यांवर त्वरित तोडगा काढावा, अशी मागणी प्रहार संघटनेने केली आहे.
महत्वाच्या बातम्या
-मुलाचा पदवीदान सोहळा आणि लेकीला सरप्राईज द्यायला निघाले होते, पण देवाच्या मनात काही वेगळंच होतं
-अहमदाबाद विमान दुर्घटना: केबिन क्रू मेंबरपैकी पिंपरीच्या २२ वर्षीय इरफानचा मृत्यू
-अरविंद केजरीवाल पुणे पालिका निवडणुकीच्या मैदानात; कार्यकर्त्यांच्या घेणार बैठका
