पुणे : अलिकडे लग्न लावून देणाऱ्या विवाहसंस्थांची संख्या चांगलीच वाढली आहे. काही विवाहस्थळ हे फक्त फसवणूकीसाठीच असल्याचे समोर आले आहे. काही नामांकित विवाह स्थळांच्या नावाचा वापर करुन देखील अनेक फसवणूक केल्याचे अनेक प्रकार उघडकीस आले आहेत. अशातच पिंपरी चिंचवड शहरात एका प्रसिद्ध विवाह संकेतस्थळाचा वापर करून एका महिलेची तब्बल ३ कोटी १६ लाख ७८ हजार रुपयांची आर्थिक फसवणूक झाल्याची धक्कादायक घटना घडली आहे.
या प्रकरणात रंजीत मुन्नालाल यादव (वय २७), सिकंदर मुन्ना खान (वय २१) आणि बबलू रघुवीर यादव (वय २५) यांना पिंपरी चिंचवड सायबर पोलिसांनी दिल्ली-हरियाणा सीमेवरून अटक केली आहे. या घटनेमुळे परिसरात खळबळ उडाली असून नागरिकांमध्ये सायबर गुन्ह्यांबाबत भीती निर्माण झाली आहे.
पोलिसांनी दिलेल्या माहितीनुसार, आरोपींनी विवाह संकेतस्थळाद्वारे पीडित उच्चशिक्षित महिलेशी संपर्क साधला आणि लग्नाचे आमिष दाखवून तिचा विश्वास संपादन केला. त्यानंतर व्यवसायातील तोटा, कच्चा माल खरेदीसाठी भांडवल किंवा विमानतळावर अधिकाऱ्यांनी अडवल्याचे खोटे कारण सांगून तिच्याकडून मोठ्या रकमा उकळल्या. या रकमा आरोपींनी ३०० ते ४०० बँक खात्यांमध्ये वळवल्या आणि इंस्टाग्राम कॉलद्वारे मुख्य सूत्रधाराच्या संपर्कात राहून रोख रक्कम त्याच्यापर्यंत पोहोचवली.
पिंपरी चिंचवड सायबर पोलिसांच्या विशेष पथकाने वरिष्ठ पोलीस निरीक्षक रवींद्र नाळे आणि सहाय्यक निरीक्षक प्रवीण स्वामी यांच्या मार्गदर्शनाखाली तांत्रिक तपास करत या तिघांना अटक केली. मुख्य सूत्रधाराचा शोध अद्याप सुरू आहे. पोलिसांनी नागरिकांना ऑनलाइन व्यवहारात सावधगिरी बाळगण्याचे आणि अनोळखी व्यक्तींना वैयक्तिक माहिती देऊ नये, असे आवाहन केले आहे. या घटनेने सायबर फसवणुकीच्या वाढत्या गुन्ह्यांकडे लक्ष वेधले आहे.
सोशल मीडियावरही अशा फसवणुकीच्या घटनांमध्ये वाढ होताना दिसत आहे. विवाह संकेतस्थळांचा गैरफायदा घेत अनेक टोळ्या सक्रिय झाल्या आहेत, ज्या नियोजनबद्धरित्या विश्वास संपादन करून आर्थिक फसवणूक करतात आणि नंतर लग्न मोडण्याची कारणे देत पळ काढतात. त्यामुळे नागरिकांनी सतर्क राहणे गरजेचे आहे. अनोळखी व्यक्तींशी संवाद साधताना वैयक्तिक माहिती शेअर करणे टाळावे, जेणेकरून अशा भामट्यांचे बळी ठरू नये.
महत्वाच्या बातम्या
-पुणेकरांची गोष्टच भारी! दक्षिण आफ्रिकेत जगप्रसिद्ध मॅरेथॉनमध्ये उंचावली देशाची शान
-फिरायला जाण्याचा प्लान करण्याआधी ही बातमी वाचाच, ‘या’ महत्वाच्या ठिकाणांवर बंदी
-पालिकेची निवडणूक होणार चार सदस्यीय प्रभाग रचनेत; ४२ प्रभागांत किती नगरसेवक?
-शिंदेसेना पुण्यात वेगळी चूल मांडणार? धंगेकरांकडून एकट्याने लढण्याचा आग्रह, शिंदेंचा निर्णय काय?
