पुणे : पुण्यातील हडपसर परिसरातील हांडेवाडी येथे सासूकडून हुंड्यासाठी होणाऱ्या छळाला कंटाळून एका उच्चशिक्षित महिलेने गळफास घेऊन आत्महत्या केल्याची हृदयद्रावक घटना घडली आहे. दीपिका प्रमोद जाधव (वय २९) असे मृत महिलेचे नाव आहे. या प्रकरणी दीपिकाच्या वडिलांनी काळेपडळ पोलीस ठाण्यात फिर्याद दाखल केली असून, सासू द्वारका नामदेव जाधव (रा. सातवनगर, हांडेवाडी रस्ता) हिच्याविरुद्ध गुन्हा नोंदवण्यात आला आहे.
पोलिसांनी दिलेल्या माहितीनुसार, दीपिका आणि प्रमोद जाधव यांचा विवाह आठ वर्षांपूर्वी झाला होता. दीपिकाने कृषी विषयात पदवी प्राप्त केली होती आणि ती एका खासगी कंपनीत नोकरी करत होती. तिचा पती शासकीय कार्यालयात लिपिक म्हणून कार्यरत आहे. दाम्पत्याला एक मुलगा आहे. मात्र, विवाहानंतर सासू द्वारका हिने दीपिकाला हुंड्यासाठी त्रास देण्यास सुरुवात केली. कमी हुंडा दिल्याचा टोमणा मारत तिचा शारीरिक आणि मानसिक छळ केला. तसेच, तिच्याकडे सतत पैशांची मागणी केली. या सततच्या त्रासाला कंटाळून दीपिकाने २० जून रोजी राहत्या घरी गळफास घेऊन आपले जीवन संपवले.
या घटनेची माहिती मिळताच वरिष्ठ पोलीस निरीक्षक मानसिंग पाटील यांनी घटनास्थळी भेट दिली. सहायक पोलीस निरीक्षक विलास सुतार यांनी तपासाची सूत्रे हाती घेतली आहेत. दीपिकाच्या वडिलांनी फिर्यादीत म्हटले आहे की, सासूच्या असह्य छळामुळेच दीपिकाने टोकाचे पाऊल उचलले. या घटनेने परिसरात हळहळ व्यक्त होत आहे. वैष्णवी हगवणे मृत्यू प्रकरणाची चर्चा ताजी असतानाच ही दुसरी घटना समोर आल्याने हुंडा आणि कौटुंबिक छळाच्या मुद्द्यावर पुन्हा एकदा गंभीर चर्चा सुरू झाली आहे.
दरम्यान, पुण्यातील कात्रज परिसरातील आंबेगाव येथे आणखी एका धक्कादायक घटनेने सर्वांचे लक्ष वेधले आहे. येथे एका महिलेने तिच्या सहा वर्षांच्या मुलाला घेऊन इमारतीच्या पाचव्या मजल्यावरून उडी मारून आत्महत्या केली. तपासात या महिलेलाही कौटुंबिक छळाला सामोरे जावे लागल्याचे समोर आले. या प्रकरणी आंबेगाव पोलिसांनी महिलेच्या पतीला अटक केली आहे. या दोन्ही घटनांनी हुंडा आणि कौटुंबिक हिंसाचाराविरुद्ध कठोर कारवाईची गरज अधोरेखित केली आहे.
महत्वाच्या बातम्या
-पुण्यात धक्कादायक प्रकार; मौत्रिणसोबत कारमध्ये बसलेल्या तरुणाला खाकीचा धाक दाखवला अन्…
-पुण्यात व्यावसायिकाने संपवले जीवन, धक्कादायक कारण आले पुढे
-हिंदी भाषा सक्तीबाबत केलेल्या वक्तव्यावरुन मुख्यमंत्री फडणवीसांना कायदेशीर नोटीस
-‘जात-पात ना धर्म रे माझ्या विठुराया पाशी’; पुण्यातील हा मुस्लिम करतोय वारकऱ्यांची सेवा
