पुणे : शहराच्या मध्यवर्ती भागातील वाहतूक कोंडी सोडवण्यासाठी प्रस्तावित शनिवारवाडा ते स्वारगेट या चौपदरी भुयारी मार्गाला केंद्रीय रस्ते वाहतूक आणि महामार्ग मंत्री नितीन गडकरी यांनी सकारात्मक प्रतिसाद दिला आहे. या प्रकल्पासाठी निधी उपलब्ध करून देण्याची मागणी आमदार हेमंत रासने यांनी केली असून, गडकरी यांनी संबंधित विभागाच्या अधिकाऱ्यांसह बैठक घेण्याचे आश्वासन दिले आहे. हा प्रकल्प शहरातील वाहतूक सुलभ करण्यासोबतच पर्यावरण रक्षण आणि ऐतिहासिक वारसा जपण्यासाठी महत्त्वपूर्ण ठरणार आहे.
गडकरी यांनी सोमवारी (२३ जून) पुणे दौऱ्यादरम्यान काकासाहेब गाडगीळ पुतळा आणि शनिवारवाडा येथे भेट देऊन प्रकल्पाची माहिती घेतली. यावेळी उच्च व तंत्रशिक्षण मंत्री चंद्रकांत पाटील उपस्थित होते. रासने यांनी निवेदन सादर करत प्रकल्पाला गती देण्यासाठी केंद्र सरकारच्या सहकार्याची विनंती केली. शिवाजी रस्ता आणि बाजीराव रस्ता हे शहरातील प्रमुख मार्ग असून, येथे दररोज लाखो वाहनांची वर्दळ असते. यामुळे होणारी वाहतूक कोंडी कमी करण्यासाठी हा भुयारी मार्ग भविष्यात ‘लिंक कॉरिडॉर’ म्हणूनही उपयुक्त ठरेल.
सार्वजनिक बांधकाम विभागाने मुख्यमंत्री देवेंद्र फडणवीस यांच्या सूचनेनुसार या प्रकल्पाचा सविस्तर प्रकल्प अहवाल (DPR) तयार करण्यास सुरुवात केली आहे. निधी उपलब्धतेसाठी अर्थ विभागाकडे प्रस्ताव पाठवण्यात आला आहे. सुमारे २.५ किमी लांबीचा हा चार पदरी भुयारी मार्ग वाहतूक कोंडीवर कायमस्वरूपी तोडगा काढण्याबरोबरच पर्यावरण आणि ऐतिहासिक वारशाचे संरक्षण करेल. या प्रकल्पाला गती देण्यासाठी केंद्र आणि राज्य सरकारच्या समन्वयाने प्रयत्न सुरू आहेत.
आमदार हेमंत रासने म्हणाले, “शिवाजी रस्ता आणि बाजीराव रस्त्यावरील वाहतूक कोंडी ही पुण्यातील प्रमुख समस्या आहे. यावर मात करण्यासाठी प्रस्तावित भुयारी मार्ग हा महत्त्वाचा प्रकल्प आहे. डीपीआर पुढील पंधरा दिवसांत पूर्ण होईल. मुख्यमंत्री देवेंद्र फडणवीस यांचे पूर्ण सहकार्य मिळत आहे, तर केंद्र सरकारच्या सहकार्याने हा प्रकल्प पूर्ण होण्यासाठी मी नितीन गडकरी यांना विनंती केली आहे. हा भुयारी मार्ग माझ्या स्वप्नातील प्रकल्प असून, तो प्रत्यक्षात यावा यासाठी मी कटिबद्ध आहे.”
महत्वाच्या बातम्या
-पालखी सोहळ्यात चोरांनी भाविकांच्या मोबाइलवर मारला डल्ला
-हुंड्याच्या छळामुळे उच्चशिक्षित महिलेने केली आत्महत्या, सासूविरुद्ध गुन्हा दाखल
-पुण्यात धक्कादायक प्रकार; मौत्रिणसोबत कारमध्ये बसलेल्या तरुणाला खाकीचा धाक दाखवला अन्…
