पुणे : संपूर्ण राज्याला हादरुन सोडणारं वैष्णवी हगवणे प्रकरणाने राज्यभरातून संतापाची लाट उसळली असून या प्रकरणातील सर्व आरोपींना अटक करण्यात आली आहे. पुणे पोलीस या आरोपींची कसून चौकशी करत आहेत. वैष्णवीच्या मृत्यूनंतर सासरे राजेंद्र हगवणे आणि तिचा दीर सुशील हगवणे हे पसार झाले होते. फरार असताना हे दोघे ज्या थारमध्ये फिरले त्या थार गाडीच्या मालकाबाबतची माहिती समोर आली आहे. हगवणे कुटुंबाने हुंड्यासाठी त्यांच्या दोन्ही सुनांचा अमानुष छळ केल्याचे उघड झालेच. यावरुन सर्वत्र संतापाची लाट उसळत आहे. पण हगवणेंचे साथीरदारही त्याच माळेचे मनी असल्याचे पहायला मिळत आहे.
ती थार नेमकी कोणाची?
संकेत नरेश चोंधे असं त्या गाडीच्या मालकाचं नाव असल्याचं समोर आलं आहे. संकेतची थार गाडी आणि त्याचा भाऊ सुयशची क्रेटा गाडी जप्त करण्यात आली आहे. धक्कादायक बाब म्हणजे संकेत नरेश चोंधे याच्यावरही वहिनीचा छळ केल्याचा आरोप आहे. संकेत हा यापूर्वी याच प्रकरणात अटकेत असलेला सुयश चोंधेचा लहान भाऊ आहे. वीस लाख हुंड्यासाठी सुयशच्या पत्नीचा छळ केला. तिनं त्याच्या छळाला कंटाळून आत्महत्येचा प्रयत्नही केला होता. त्याचबरोबर या त्रासानंतर तिनं महिला आयोगाकडेही तक्रार दाखल केली होती. चोंधे कुटुंबीयांकडून छळ होत असल्याच्या तक्रारीनंतर बावधन पोलिस स्टेशनमध्ये गुन्हा दाखल करण्यात आला होता. मात्र चोंधे परिवाराच्या एकाही सदस्याला या प्रकरणात अद्याप अटक झालेली नाही. त्यामुळे या हगवणे पितापुत्रांच्या सोबतच्या संबंधितांमध्ये ही अशाच पध्दतीने महिलांचा छळ होतो का असा प्रश्न आहे.
सासूने काळी जादूचे प्रयोग केले
वैष्णवी हगवणे प्रकरण समोर आल्यानंतर सुरू झालेल्या तपासामध्ये आत्तापर्यंत हगवणेंना मदत करणाऱ्यांमधील आरोपी हे घरात अशाच पध्दतीने महिलांचा छळ करत असल्याची संतापजनक माहिती समोर आली आहे. दरम्यान आपला शारिरीक आणि मानसिक छळ केला जात असल्याची तक्रार सुयश चोंधे याच्या पत्नीने केली आहे. नवरा सुयश चोंधे, दीर संकेत चोंधे, सासरा नरेश चोंधे, सासू वैशाली चोंधे यांच्या विरोधात पोलिस आणि महिला आयोगामध्ये तक्रार केली होती. मात्र त्यांनी पूर्णपणे दुर्लक्ष केल्याचा आरोप केला जात आहे. चोंधे कुटुंबावर आरोप करणाऱ्या त्यांच्या सूनेने त्रासाला कंटाळू आत्महत्या करण्याचा प्रयत्न केला होता. ‘आपली सासू काळी जादू करते’ असा आरोप सूनेने केला आहे.
लग्नात दोन लाख रुपये हुंडा दिला आणि दोन तोळं सोनंही दिलं होतं. परंतु लग्न झाल्यानंतर वारंवार पैशांची मागणी केली जात होती. त्यातून आपल्याला मारहाण केली जाते, आपला छळ केला जातो असं सूनेने तक्रारीत म्हटलं आहे. तर नवरा सुयश चौंधे हा अश्लील व्हिडीओ दाखवून दाखवून शरीर संबंध ठेवण्यासाठी त्रास देत होता. ‘नवरा आणि दीर सासूसमोरच गांजा प्यायचे’ असं सुयश चौंधेच्या पत्नीने तक्रारीत सांगितलं आहे. अशातच आता ‘आपल्याला आणि आपल्या मुलीला न्याय मिळावा’, अशी मागणी केली आहे. पोलिसांनी वैष्णवी हगवणे प्रकरणातील आरोपींना मदत करणाऱ्या चोंधे बंधूंकडे बावधन पोलिसांची चौकशी सुरू आहे. तसेच सुयश चोंधे याच्यावर पत्नीच्या तक्रारीवरून मंगळवारी रात्री अदखलपात्र गुन्हा दाखल करण्यात आला आहे.
महत्वाच्या बातम्या
-महिला आयोगाचे दोन्ही नंबर ‘नॉट एक्झिस्ट’?, मनसेचं थेट मुख्यमंत्र्यांना पत्र, पत्रातून ‘ही’ मागणी
-वैष्णवीचा अमानुष छळ, अंगावर मारहाणीच्या २९ खुणा, मृत्यूपूर्वी नेमकं काय घडलं?
