पुणे : सध्या राज्याच्या राजकारणात सर्वत्र स्थानिक संस्था निवडणुकांची तयारी सुरु आहे. अशातच आता पुण्याच्या राजकीय वर्तुळातून मोठी बातमी समोर येत आहे. पुणे महानगरपालिकेच्या आगामी निवडणुकीच्या पार्श्वभूमीवर महाराष्ट्र नवनिर्माण सेना स्वबळावर लढण्याच्या तयारीत आहे. राज ठाकरे यांच्या नेतृत्वाखालील मनसेने पुण्यात “एकला चलो रे”चा नारा देत स्वतंत्रपणे निवडणूक लढवण्याचा निर्णय घेतला आहे. यासंदर्भात पुण्यातील मनसेच्या शहर कार्यालयात नुकतीच एक महत्त्वाची बैठक पार पडली.
मनसेच्या या बैठकीमध्ये स्थानिक स्वराज्य संस्थांच्या निवडणुकीसाठी रणनीती आखण्यात आली. मनसे पुण्यातील सर्व जागांवर उमेदवार उभे करणार असल्याचे संकेत मिळाले आहेत. 9 जून रोजी राज ठाकरे पुणे दौऱ्यावर येत असून, त्यावेळी ते सर्व पदाधिकाऱ्यांची बैठक घेणार आहेत. या बैठकीत शहरातील पक्षाच्या संघटनेत मोठे बदल होण्याची शक्यता आहे. मनसे पुण्यातील सर्व शाखाप्रमुख बदलणार असून, गटप्रमुखांच्या नवीन निवडीही केल्या जाणार आहेत. याशिवाय, शाखाप्रमुख आणि गटप्रमुखांवर लक्ष ठेवण्यासाठी नवीन पद निर्माण करून त्यांच्या नियुक्त्या करण्याचा निर्णय घेण्यात आला आहे.
मनसेच्या या हालचालींमुळे पुण्यातील राजकीय वातावरण तापण्याची चिन्हे आहेत. पक्षाने यापूर्वी शिवसेना (उद्धव बाळासाहेब ठाकरे) यांच्यासोबत युतीची चर्चा असतानाही स्वबळावर निवडणूक लढवण्याचा निर्णय घेतला आहे. पुण्यातील स्थानिक कार्यकर्त्यांना बळ देण्यासाठी आणि पक्षाची ताकद वाढवण्यासाठी मनसेने संघटनेत फेरबदल आणि नवीन नियुक्त्यांचा मार्ग स्वीकारला आहे. येत्या काळात मनसेची ही रणनीती कितपत यशस्वी ठरते, हे पाहणे औत्सुक्याचे ठरणार आहे.
महत्वाच्या बातम्या
-पुण्यात प्रभाग रचना बदलली जाणार, कशी असणार नवीन रचना? आज येणार महत्त्वाची अपडेट
-पुणेकरांसाठी महत्वाची बातमी; गुरुवारी शहरातील ‘या’ भागात पाणी पुरवठा बंद
-शरद पवारांबद्दल गोपीचंद पडळकरांचं वादग्रस्त वक्तव्य; अखेर न्यायालयाने केली निर्दोष मुक्तता
-जेसीबी प्रकरणात ११ लाखांची फसवणूक अन् बंदुकीचा धाक दाखवला; हगवणेंचा पाय आणखी खोलात
-हगवणे बाप लेकाला १४ दिवसांची न्यायालयीन तर निलेशला ७ दिवस पोलीस कोठडी, न्यायालयात आज काय झालं?
