पुणे : दहावीच्या पेपर फुटीचा खेळ उघडकीस आला आहे. पेपर फुटलाच नसल्याचे तपासात समोर आले असून, फक्त पैसे उकळण्यासाठी बनावट पेपर फुटीचा डाव रचला गेला होता. या प्रकरणात १८ वर्षीय चैतन्य शेंडे या तरुणाला चंद्रपूरहून शिवाजीनगर पोलिसांनी अटक केली आहे. चैतन्य हा चंद्रपूरचा रहिवासी असून नर्सिंगच्या दुसऱ्या वर्षाचा विद्यार्थी आहे.
टेलिग्रामवर चैतन्यने परीक्षेच्या आदल्या दिवशी एक पीडीएफ अपलोड करायचा, ज्याला पासवर्ड असायचा. “माझ्याकडे दहावीचा पेपर आहे, ६०० रुपये पाठवा” असा मेसेज ग्रुपमध्ये टाकायचा. जे पैसे पाठवायचे, त्यांचा नंबर ब्लॉक करायचा. पेपर संपल्यानंतर तोच पीडीएफ एडिट करून त्यात त्या दिवसाचा खरा पेपर टाकायचा आणि सर्वांना हाच पेपर दिल्याचा भासवायचा. अशा पद्धतीने अनेक विद्यार्थी आणि पालक फसवले गेले.
शिक्षण मंडळाला टेलिग्रामवर पेपर फुटल्याचा संशय आल्याने शिवाजीनगर पोलीस ठाण्यात तक्रार दाखल झाली होती. गुन्हे शाखेच्या युनिट-१ ने सीसीटीव्ही आणि गुप्त माहितीच्या आधारे आरोपीचा माग काढला. चंद्रपूरमध्ये लॉजमध्ये लपलेला असताना त्याला अटक करण्यात आली. परिमंडळ एकचे पोलीस उपायुक्त कृषीकेश रावले यांनी सांगितले की, आरोपीने अनेक जणांना फसवले असून, किती लोकांकडून किती पैसे उकळले याचा तपास सुरू आहे.
या प्रकाराने परीक्षेच्या काळात होणाऱ्या फसवणुकीच्या घटनांवर पुन्हा प्रकाश पडला आहे. पोलिसांनी सांगितले की, टेलिग्राम ग्रुप्समधील अशा बनावट पेपर फुटीच्या जाळ्यांचा सखोल तपास सुरू असून, लवकरच आणखी अटका होण्याची शक्यता आहे. विद्यार्थी आणि पालकांनी अशा फसवणुकीला बळी पडू नये म्हणून सावध राहण्याचे आवाहन करण्यात आले आहे.
महत्वाच्या बातम्या-
-मुरलीधर मोहोळ यांना एक महिन्याची सक्तीची विश्रांती; २९ वर्षांपूर्वीच्या दुखापतीसाठी शस्त्रक्रिया!
-पुण्यात पाणीटंचाईवर महिला आक्रमक, शिवसेनेचा महापालिकेवर हंडा मोर्चा
-‘अजितदादां’च्या नावाचा गैरवापर थांबवण्यासाठी कठोर नियम; कुटुंबीयांची पूर्वपरवानगी अनिवार्य
