पुणे : सुसंस्कृत म्हणवल्या जाणाऱ्या पुणे शहरामध्ये आणखी एक हगवणे प्रकरणाची पुनरावृत्ती झाल्याचं पहायला मिळत आहे. सासरच्या जाचाला कंटाळून इंजिनियर विवाहितेने गळफास घेत आपले जीवन संपवले आहे. ही घटना उरुळीकांचन जवळील सोरतापवाडी येथे घडली आहे. दीप्ती मगर चौधरी (२७) या विवाहितेने घरातच तीन वर्षांच्या मुलीसमोर गळफास घेतला. त्याच वेळी तिच्या १३ वर्षांच्या मुलीवरही प्राणघातक हल्ला करण्याचा प्रयत्न झाला. मुलीने थोडक्यात बचाव केले असून तिच्यावर सध्या रुग्णालयात उपचार सुरू आहेत.
दीप्ती आणि रोहन चौधरी यांचा २०१९ मध्ये विवाह झाला होता. लग्नात ५० तोळे सोने देण्यात आले होते. नंतर विवाहितेवर वेगवेगळे आरोप करण्यात आले. एक महिन्यानंतर सासरकडून मानसिक व शारीरिक छळ सुरू झाला. दिसायला सुंदर नाही, घरातली कामे येत नाहीत, असे आरोप करून तिचा छळ करण्यात आला. मुलीचा संसार चांगला व्हावा म्हणून सासरच्यांना १० लाख रुपये रोख आणि गाडीसाठी २५ लाख रुपये दिले होते. तरीही त्रास संपला नाही. अखेर दीप्तीने गळफास लावून आपले जीवन संपवले आहे.
रोहन चौधरी (पती), सुनीता चौधरी (सासू), कारभारी चौधरी (सासरे) आणि रोहित चौधरी (दीर) यांच्या विरोधात उरुळीकांचन पोलीस ठाण्यात गुन्हा दाखल करण्यात आला आहे. सासू सुनीता चौधरी ऑक्टोबर २०२५ मध्ये सोरतापवाडी ग्रामपंचायतची सरपंच झाल्या होत्या. सासरे शिक्षक आहेत. पोलिसांनी सासू आणि पतीला अटक केली आहे.
दीप्तीच्या आईने पोलिसांना दिलेल्या तक्रारीत म्हटले आहे की, ऑक्टोबर २०२५ मध्ये सुनीता चौधरी सरपंच झाल्यानंतर मोठेपणा दाखवण्यासाठी दीप्तीकडे पैशांची मागणी केली गेली. दीप्तीने माहेरून पैसे आणणार नाही असे सांगितल्याने पती रोहन, सासरे कारभारी, सासू सुनीता आणि दीर रोहित यांनी शारीरिक व मानसिक त्रास सुरू केला. पतीने तिच्या माहेरच्या लोकांना भिकारी म्हणून टोचले. सासूनेही माहेरच्या लोकांबाबत खालच्या स्तरावर शिवीगाळ केली, असे तिने आईला सांगितले होते. या घटनेने पुण्यातील कुटुंबीयांमधील तणाव आणि मानसिक आरोग्याच्या मुद्द्यावर पुन्हा चर्चा सुरू झाली आहे. पोलिसांनी आरोपींविरोधात भारतीय न्याय संहिता अंतर्गत गुन्हा दाखल केला असून, पुढील तपास सुरू आहे. या घटनेमुळे समाजातील महिलांच्या मानसिक तणावाकडे आणि कुटुंबातील छळाकडे लक्ष वेधले गेले आहे.
महत्वाच्या बातम्या-
-फळांचा राजा पुण्याच्या बाजारात दाखल! एका पेटीची किंमत तब्बल १५ हजार
-पुण्याचा महापौर, उपमहापौर निवडीची तारीख ठरली! ‘या’ दिवशी होणार पहिली विशेष सभा
