पुणे : पुणे शहराच्या शाश्वत आणि समतोल विकासासाठी स्थापन झालेल्या ‘शहर परिवर्तन कक्ष’ची पहिली बैठक ५ फेब्रुवारी २०२६ रोजी महापालिका स्थायी समिती सभागृहात पार पडली. महापालिका आयुक्त नवल किशोर राम यांच्या अध्यक्षतेखाली झालेल्या या बैठकीत शहरातील विविध विकास प्रकल्प, नागरी सेवा, पर्यावरण व्यवस्थापन आणि पायाभूत सुविधांबाबत सखोल चर्चा झाली. महापालिका आयुक्तांसह पिंपरी-चिंचवड महापालिका आयुक्त, जिल्हाधिकारी, अतिरिक्त आयुक्त, मुख्य अभियंता आणि विविध विभागांचे वरिष्ठ अधिकारी उपस्थित होते.
बैठकीत सर्व विभागांचे नोडल अधिकारी नेमण्याचा निर्णय घेण्यात आला. भूसंपादन प्रकरणे प्रलंबित असल्याने त्यावर त्वरित कार्यवाही करण्याचे निर्देश देण्यात आले. प्रत्येक विभागाने प्राथमिकता निश्चित करून एक महिन्याच्या आत प्रकरणे निकाली काढण्याची जबाबदारी घेतली आहे. बंद असलेल्या कालव्यांचा वापर सायकल ट्रॅकसाठी करण्याबाबत जलसंपदा विभागाशी समन्वय साधण्याचे आदेश देण्यात आले.
शहरातील फ्लेक्स होर्डिंग, अस्ताव्यस्त विद्युत आणि दूरध्वनी केबल, बेवारस वाहने अशा समस्यांवर त्वरित कारवाई करण्याचे निर्देश देण्यात आले. फुटपाथ आणि रस्त्यांवरील अडथळे दूर करणे, कचरा व्यवस्थापन सुधारणे आणि नागरिकांच्या सुरक्षेसाठी आवश्यक उपाययोजना प्राधान्याने राबवण्यावर भर देण्यात आला. सर्व विभागांनी एकत्रितपणे काम करावे आणि पर्यावरणीय बाबींचा विचार करून विकास साधावा, असे प्रतिपादन आयुक्तांनी केले.
आगामी एक वर्षात हाती घेण्यात येणाऱ्या प्रकल्पांचे प्रस्ताव आणि कामकाज वेळेत कळवावे, असे आदेश देण्यात आले. कोणत्याही प्रकल्पासाठी संबंधित विभागाच्या नियोजन आणि मंजुरीशिवाय परवानगी दिली जाणार नाही. शहर परिवर्तन कक्षाची बैठक दरमहा एकदा घेण्यात येईल, असे आयुक्तांनी जाहीर केले.
या बैठकीमुळे पुणे शहराच्या विकासासाठी समन्वयाची नवी सुरुवात झाली आहे. विविध विभागांमधील समन्वय, प्रलंबित प्रकरणे निकाली काढणे आणि नागरी सुविधा सुधारणे यावर भर देण्यात आला असून, पुण्याला अधिक शाश्वत आणि नागरिककेंद्रित शहर बनवण्यासाठी हे पाऊल महत्त्वाचे ठरणार आहे.
महत्वाच्या बातम्या-
-सोमेश्वरवाडीत महाशिवरात्रीची तयारी; सोमेश्वर मंदिर परिसरात विशेष स्वच्छता अभियानाचे आयोजन
-फेसबुकवर प्रेम अन् ऑनलाइन गेमिंगसाठी फसवणूक तरुणाची ९२ हजारांची लूट, मुख्य आरोपी अटकेत
-‘अजितदादांच्या विकासदृष्टीचा सन्मान म्हणून पुणे पालिकेत पुतळा उभारावा’, प्रमोद भानगिरेंची मागणी
-पिंपरी-चिंचवडमध्ये भाजप आमदार महेश लांडगेंचा ‘आदर्श’, रवि लांडगेंना ‘‘महापौरपदी’’ संधी
