नवी दिल्ली : लोकसभा निवडणुकीत अपेक्षित यश मिळाले नसले, तरी विधानसभा निवडणुकीत भाजपने आपल्या संघटनशक्तीच्या जोरावर मोठे यश मिळवलं. आता पुणे महानगरपालिका निवडणुकीतही यश मिळवण्यासाठी पक्षाने ‘एक पान – एक कार्यकर्ता’ या रणनीतीवर आधारित जोरदार तयारी सुरू केली आहे. याच पार्श्वभूमीवर पुण्यातील भाजप मंडल अध्यक्षांचा दिल्ली दौरा महत्त्वाचा ठरला.
या दौऱ्यात पुण्याच्या मंडल अध्यक्षांनी केंद्रीय गृहमंत्री अमित शहा, भाजपचे राष्ट्रीय अध्यक्ष जे. पी. नड्डा आणि केंद्रीय मंत्री नीतीन गडकरी यांच्याशी थेट संवाद साधला. पुण्याचे खासदार आणि केंद्रीय राज्यमंत्री मुरलीधर मोहोळ यांच्या पुढाकाराने हा दौरा आयोजित करण्यात आला होता. या भेटीत स्थानिक निवडणुकांबाबत मंडल अध्यक्षांनी आपला अभिप्राय मांडला.
अमित शहा यांनी या भेटीत कार्यकर्त्यांना मतदार यादीतील प्रत्येक पानावर (पन्ना) नियुक्त असलेल्या कार्यकर्त्यांशी सतत संपर्क ठेवण्याचा सल्ला दिला. “भाजपचे खरे बळ हे त्याचे कार्यकर्ते आहेत. लोकसभा आणि विधानसभा निवडणुकीतील यश हे केवळ रणनीतीचे फळ नसून, कार्यकर्त्यांच्या मेहनतीचे परिणाम आहे,” असे त्यांनी सांगितले.
राष्ट्रीय अध्यक्ष जे. पी. नड्डा यांनी पक्षाच्या कार्यपद्धतीवर प्रकाश टाकला. “भाजप नेहमीच निवडणूक मोडमध्ये असतो. आम्ही विजय किंवा पराभव बाजूला ठेवून आकडेवारी आणि प्रत्यक्ष फीडबॅकवर आधारित रणनीती आखतो,” असे त्यांनी स्पष्ट केले. मंडल अध्यक्षांच्या अनुभवांवर आधारित चर्चा आणि प्रश्नोत्तर सत्र या भेटीचे वैशिष्ट्य ठरले.
केंद्रीय मंत्री नीतीन गडकरी यांनी कार्यकर्त्यांच्या योगदानाला सलाम केला. “भाजपमध्ये मोठ्या नेत्यांइतकेच मंडल कार्यकर्त्यांना महत्त्व आहे. हेच पक्षाचे वेगळेपण आहे,” असे त्यांनी ठामपणे सांगितले. सुसंवाद आणि संघटनशक्ती हीच भाजपची ताकद असल्याचे त्यांनी अधोरेखित केले. हा दौरा केवळ औपचारिक भेट न राहता, राजकीय चर्चेचा केंद्रबिंदू ठरला. संसद अधिवेशनादरम्यान राष्ट्रीय नेत्यांनी पुण्यातील मंडल अध्यक्षांसाठी वेळ काढला, हे पक्षाच्या कार्यकर्त्यांवरील विश्वासाचे द्योतक आहे.
खासदार मुरलीधर मोहोळ यांनी सांगितले, “महापालिका निवडणुका जवळ आल्या असताना पक्ष संघटना बळकट करणे, कार्यकर्त्यांचे मनोबल वाढवणे आणि थेट संवादातून दिशा निश्चित करणे, हे या दौऱ्याचे उद्दिष्ट होते.” या दौऱ्यातून कार्यकर्त्यांशी थेट संवाद साधण्याची भाजपची परंपरा पुन्हा एकदा समोर आली. संसदेत पुण्यातील मंडल अध्यक्षांनी राष्ट्रीय नेत्यांसमोर आपले विचार, शंका आणि मत निर्भयपणे मांडली. यामुळे पुणे महानगरपालिका निवडणुकीत भाजप अधिक शिस्तबद्ध आणि तयार असल्याचे स्पष्ट दिसते.
महत्वाच्या बातम्या
-स्वर्गीय विनायक निम्हण स्मृती करंडक ‘महाराष्ट्र राज्य कॅरम अजिंक्यपद’ स्पर्धा
-धक्कादायक: पुणे पालिका आयुक्तांचं घर कोणी लुटलं, सीआयडी चौकशीची मागणी
-कोथरुड पोलिसांवर ३ तरुणींना मारल्याचा आरोप; ससून रुग्णालयाचा धक्कादायक रिपोर्ट
