पुणे : अहमदाबाद येथे झालेल्या भीषण विमान अपघातात पिंपरी चिंचवडच्या संत तुकाराम नगर येथील २२ वर्षीय इरफान समीर शेख याचा दुर्दैवी मृत्यू झाला. इरफान हा एअर इंडियाच्या लंडनला जाणाऱ्या विमानात कॅबिन क्रू मेंबर म्हणून कार्यरत होता. दोन वर्षांपासून एअर इंडियामध्ये काम करणारा इरफान नुकताच बकरी ईद साजरी करण्यासाठी घरी आला होता. त्याच्या अकाली निधनाने कुटुंबीय आणि नातेवाईकांवर दुखाचा डोंगर कोसळला आहे. त्याचा मृतदेह लवकर मिळावा, अशी मागणी त्यांचे नातेवाईक करत आहेत.
इरफान शेख हा पिंपरी चिंचवडच्या संत तुकाराम नगर येथे आपल्या कुटुंबासह राहत होता. त्याच्या कुटुंबात आई-वडील, मोठा भाऊ, आजी-आजोबा यांचा समावेश आहे. मूळचा साताऱ्यातील मेढा येथील असलेले शेख कुटुंब गेल्या पन्नास वर्षांपासून पिंपरीत स्थायिक आहे. इरफानने सुरुवातीला डोमेस्टिक क्रू म्हणून काम केले आणि नंतर आंतरराष्ट्रीय उड्डाणांवर कॅबिन क्रू म्हणून कार्यरत झाला. मनमिळावू स्वभावामुळे तो सर्वांचा लाडका होता. बकरी ईदसाठी घरी आल्यानंतर त्याने कुटुंबीयांसोबत तीन दिवस घालवले होते.
गुरुवारी दुपारी अहमदाबादहून लंडनला जाणारे एअर इंडियाचे विमान टेकऑफनंतर काही मिनिटांतच कोसळले. या विमानात २३० प्रवासी आणि १२ क्रू मेंबर्स असे एकूण २४२ जण होते. दुर्दैवाने, या अपघातात २४१ जणांचा मृत्यू झाला, तर एकमेव व्यक्ती जिवंत आहे आणि तिच्यावर उपचार सुरू आहेत. विमानाचा काही भाग डीजे मेडिकल कॉलेजच्या हॉस्टेल इमारतीवर पडल्याने त्या इमारतीचेही मोठे नुकसान झाले. इरफानने टेकऑफपूर्वी आपल्या आईशी फोनवर संवाद साधला होता, अशी माहिती नातेवाईकांनी दिली.
इरफानचा मृतदेह मिळवण्यासाठी त्याची आई आणि मोठा भाऊ अहमदाबादला रवाना झाले आहेत. मात्र, डीएनए तपासणीनंतरच त्यांचे पार्थिव कुटुंबीयांना सुपूर्द केले जाईल, अशी माहिती इरफानचे काका फिरोज शेख यांनी दिली. या अपघाताने संपूर्ण कुटुंब उद्ध्वस्त झाले असून, इरफानच्या अकाली निधनाने परिसरात शोककळा पसरली आहे. त्याच्या कुटुंबीयांना आणि मित्रमंडळींना या दुखातून सावरण्यासाठी समाजाकडूनही पाठिंबा मिळत आहे.
महत्वाच्या बातम्या
-अरविंद केजरीवाल पुणे पालिका निवडणुकीच्या मैदानात; कार्यकर्त्यांच्या घेणार बैठका
-अहमदाबादमध्ये प्रवासी विमान नागरी वस्तीत कोसळलं, २४२ प्रवाशांना घेऊन टेकऑफ केलं अन्…
-विवाहसंस्थेच्या नावाखाली उच्चशिक्षित तरुणीसोबत प्रेमाचं नाटक केलं अन् तिघांनी मिळून… पुढे काय झालं?
-पुणेकरांची गोष्टच भारी! दक्षिण आफ्रिकेत जगप्रसिद्ध मॅरेथॉनमध्ये उंचावली देशाची शान
