पुणे : गेल्या काही दिवसांपासून वैष्णवी हगवणे प्रकरणामध्ये अनेक धक्कादायक खुलासे होत आहेत. या प्रकरणातील फरार आरोपी निलेश चव्हाणला पकडल्याचा खोटा फोन करून नांदेड सिटी पोलिसांची फसवणूक करणाऱ्या व्यक्तीविरुद्ध गुन्हा दाखल झाला आहे. बक्षीस मिळवण्याच्या हेतूने या व्यक्तीने बनावट माहिती दिल्याचे तपासात समोर आले आहे. ही घटना नांदेड सिटी पोलीस ठाण्याच्या हद्दीत घडली. पोलिसांनी या प्रकरणी कठोर कारवाईचा इशारा दिला आहे.
संतोष दत्तात्रय गायकवाड (वय 33, रा. किरकटवाडी, पुणे) असे गुन्हा दाखल झालेल्या व्यक्तीचे नाव आहे. त्याने पोलिसांच्या 112 आपत्कालीन क्रमांकावर फोन करून दावा केला की, “आम्ही वैष्णवी हगवणे प्रकरणातील फरार आरोपी निलेश चव्हाणला पकडले आहे. त्याच्याकडे दोन पिस्तूल आहेत आणि आम्ही त्याला मारहाण करून गाडीच्या डिक्कीत ठेवले आहे.” या माहितीच्या आधारे पोलिसांनी तातडीने कारवाई सुरू केली.
पोलिसांची टीम दिलेल्या ठिकाणी पोहोचली, परंतु तिथे काहीही संशयास्पद आढळले नाही. यानंतर तपासादरम्यान कॉल करणाऱ्या व्यक्तीचा शोध घेतला असता, तो किरकटवाडी येथील पानशेत रस्त्यावरील ‘स्वागत हॉटेल’ परिसरात आढळला. चौकशीत गायकवाड याने खोटी माहिती दिल्याचे कबूल केले. त्याने सांगितले की, फरार आरोपीबद्दल माहिती दिल्यास पोलिसांकडून बक्षीस मिळेल, या हेतूने त्याने हा बनाव रचला.
नांदेड सिटी पोलिसांनी संतोष गायकवाड याच्यावर आयपीसी कलम 182 (खोटी माहिती देणे), 211 (खोटे आरोप करणे) आणि 505 (अ) (अफवा पसरवणे) अंतर्गत गुन्हा दाखल केला आहे. पोलिसांनी नागरिकांना आवाहन केले आहे की, अशा खोट्या माहितीमुळे पोलिस यंत्रणेचा वेळ आणि संसाधने वाया जातात, तसेच गंभीर गुन्ह्यांचा तपास प्रभावित होतो. वैष्णवी हगवणे प्रकरणातील फरार आरोपी निलेश चव्हाणचा शोध घेण्यासाठी पोलिसांचा तपास सुरू आहे.
महत्वाच्या बातम्या
-वैष्णवीचे चारित्र्यहनन करणाऱ्या वकिलाचे जुने कांड उघड; “3 वर्षापूर्वीच एका वकिलाला…”
-आता भाजप आमदारही नाहीत सुरळीत? शिवीगाळ केली अन् घरात घुसण्याचा प्रयत्न, एकाला अटक
-हगवणे बंधूंच्या अडचणी वाढणार; पोलीस तपासात पिस्तूलबाबत धक्कादायक माहिती समोर
