पुणे : पुण्यातील बुधवार पेठ परिसरात फरासखाना पोलिसांनी मध्यरात्री राबवलेल्या विशेष ‘कॉम्बिंग ऑपरेशन’मध्ये ५ बांगलादेशी महिलांना बेकायदेशीर वास्तव्याप्रकरणी ताब्यात घेतले आहे. या महिलांकडे भारतात राहण्यासाठी कोणतीही वैध कागदपत्रे नव्हती. विशेष म्हणजे, देहविक्रीच्या व्यवसायात गुंतलेल्या या महिलांनी सुरुवातीला आपण पश्चिम बंगालच्या रहिवासी असल्याचा बनाव केला होता, मात्र पोलिसांच्या चाणाक्ष प्रश्नांसमोर त्यांचा हा खोटेपणा अवघ्या काही मिनिटांत उघड झाला.
पोलिसांनी या महिलांच्या संशयास्पद बोलण्याच्या पद्धतीवरून त्यांची उलटतपासणी सुरू केली. जेव्हा त्यांना भारताचे राष्ट्रगीत म्हणायला सांगितले आणि देशाच्या पंतप्रधानांचे नाव विचारले, तेव्हा त्या निरुत्तर झाल्या. इतकेच नाही तर पश्चिम बंगालमधील आपल्या गावांची नावे सांगण्यातही त्या अपयशी ठरल्या. या दोन साध्या प्रश्नांनी त्या भारतीय नसल्याचे सिद्ध झाले आणि त्यांनी बेकायदेशीरपणे सीमा ओलांडून भारतात प्रवेश केल्याची कबुली दिली.
फरासखाना पोलिसांनी ही कारवाई रविवारी रात्री १ ते सोमवारी सकाळी ९ वाजेपर्यंत बुधवार पेठ परिसरातील माचिस बिल्डिंग आणि इतर भागात केली. परिमंडळ १ चे पोलीस उपायुक्त ऋषिकेश रावले यांनी दिलेल्या माहितीनुसार, या महिला स्वतःच्या इच्छेने या व्यवसायात सहभागी झाल्या होत्या. पुणे पोलीस आयुक्त अमितेश कुमार यांच्या मार्गदर्शनाखाली शहरात घुसखोरांविरोधातील ही मोहीम तीव्र करण्यात आली असून, संशयितांची सखोल चौकशी केली जात आहे.
पुण्यात गेल्या ११ महिन्यांत तब्बल ९५ बांगलादेशी नागरिकांना ताब्यात घेण्यात आले आहे, ही आकडेवारी चिंता वाढवणारी आहे. दिवसेंदिवस वाढणाऱ्या या घुसखोर संख्येमुळे पुणे शहराच्या सुरक्षेचा प्रश्न ऐरणीवर आला आहे. पोलिसांच्या या धडक कारवाईचे सर्वत्र कौतुक होत असले, तरी पुण्यातून अशा घुसखोरांचे समूळ उच्चाटन कधी होणार? असा सवाल आता पुणेकर उपस्थित करत आहेत.
महत्वाच्या बातम्या-
-सूर, ताल आणि कौतुकाचा वर्षाव! ‘पुणे आयडॉल २०२६’चा महाअंतिम सोहळा दिमाखात संपन्न
-राष्ट्रवादीत मोठी खळबळ; महिला आयोग अध्यक्षपदावरुन रणकंदन, अध्यक्षपदाची मोठी चर्चा
-पुण्यात सुनेला संपवलं, अन् घराला कुलूप लावून फरार झाला, ८ दिवसांनी पोलिसांनी ठोकल्या बेड्या
-पुण्यात जमीन मोजणीचे डोंगर उपसण्यासाठी मोठा निर्णय! ४० नवे खासगी भूमापक नेमणार
-बारामतीत राजकीय हलचाल! सोमेश्वर साखर कारखान्याचे उपाध्यक्ष मिलिंद कांबळे यांचा राजीनामा
