पणे: आजचा काळामध्ये ‘हम दो हमारे दो’ म्हणत एकत्रित कुटुंब पद्धतीला फाटा दिला जात असल्याचे पाहायला मिळतं. परंतु आजही अशी अनेक कुटुंब आहेत जिथे सर्वजण गुण्यागोविंदाने एकत्रित राहत आहेत. यातील एक आदर्श उदाहरण म्हणजे माजी उपमहापौर उल्हास उर्फ आबा बागुल यांचा परिवार. एकत्र कुटुंब पद्धतीत प्रत्येक सदस्याचे विचार, आवड – निवड वेगवेगळ्या असतात तरीही त्यांच्यामधील प्रेम व जिव्हाळा जपत सर्वांना बरोबर घेऊन चालणे एक कुटुंब प्रमुख म्हणून तारेवरची कसरत आबा बागुल व सौ जयश्री आबा बागुल या दांपत्याने यशस्वीरित्या पार पाडली आहे. याचाच गौरव जनसेवा फाउंडेशनतर्फे आदर्श एकत्र कुटुंब पुरस्कार देऊन करण्यात आला आहे.
जनसेवा फाउंडेशनच्यावतीने आदर्श एकत्र कुटुंब पुरस्कार बागुल कुटुंबियांना देण्यात आला. माजी विरोधी पक्षनेते आबा बागुल व त्यांच्या पत्नी जयश्री आबा बागुल यांनी हा पुरस्कार स्वीकारला. यावेळी डॉ. डी. वाय. पाटील विद्यापिठाचे कुलगुरू पी. डी. पाटील, प्रसिद्ध बांधकाम व्यावसायिक कृष्णकुमार गोयल, विनोद शहा आदींसह मान्यवर उपस्थित होते.
यावेळी मनोगत व्यक्त करताना बागुल म्हणाले, “मुलांवर संस्कार घडवणे, तरुण पिढीला मार्गदर्शनपर सल्ला देणे, महत्त्वाच्या निर्णयात सर्व सदस्यांना सहभागी करून घेणे, त्यांच्या मतांचा विचारांचा आदर करणे याच गोष्टींमुळे आज बागुल कुटुंबात तीन पिढ्या एकत्र नांदत आहेत. आज आमची मुले उच्चशिक्षित आहेत. आर्किटेक्ट, बीबीए, एआय इंजिनिअरिंग, वैद्यकीय आदी विविध शाखेत अव्वल ठरली आहेत. जनरेशन गॅप आहे आणि असणारच मात्र ती कमी करणे हे आपल्याच हातात आहे”.
