लखनऊ : हल्ली कधी कोण कोणाच्या प्रेमात पडेल सांगता येत नाही. गेल्या काही दिवसांपूर्वी एक महिला मुलीच्या लग्नात जावयासोबत पळून गेलेलं ऐकलं. त्यानंतर आता उत्तर प्रदेशमधील हमीरपूर जिल्ह्यातून आणखी एक धक्कादायक घटना समोर आली आहे. लग्न सोहळा पार पडून २४ तासही उलटले नाही त्या आधीच नवरी तिच्या मेहुण्यासोबत पळून गेल्याचा धक्कादायक प्रकार घडला आहे.
वधू फरार झाल्याची बातमी मिळताच सासरच्या घरात एकच खळबळ उडाली. या संपूर्ण प्रकरणात, नवऱ्याकडील मंडळीने पोलीस ठाण्यात तक्रार दाखल केली आहे आणि नवरी मुलीवर पैसे आणि दागिने घेऊन पळून गेल्याचा आरोप केला आहे. पोलिसांनी या प्रकरणात दोन्ही पक्षांना समजावण्याचा प्रयत्न केला आहे.
नेमकं काय घडलं?
१७ मे रोजी हमीरपूरच्या बिवार पोलीस स्टेशन परिसरातील एका तरुणाच्या लग्नाची मिरवणूक जलालपूर पोलीस स्टेशन परिसरातील एका गावात गेली आणि १८ मे रोजी वधूला निरोप देऊन गावात परत आणण्यात आले. लग्नाच्या मिरवणुकीनंतर, दिवसभरात सर्व परंपरेनुसार विधीवत पुजाअर्चा करण्यात आली. १९ मे रोजी काही विधी करण्यात आले आणि त्याच रात्री नवरीने तिच्या मेहुण्याला फोन करून घरी बोलावलं. तोही दोन अज्ञात साथीदारांना घेऊन तिच्या घरी पोहचला. त्याच रात्री वर आपल्या वधूसाठी पान खरेदी करण्यासाठी गेला तोपर्यंत इकडे वधू मात्र तिच्या मेहुण्यासोबत पसार झाली.
नवरीला तिच्या मेहुण्यासोबत पळून गेल्याचे पाहून नवऱ्याने घरात गोंधळ सुरू केला. लग्नासाठी आलेल्या नातेवाईकांनीही गाडीचा पाठलाग केला, पण नवरी कोणाच्याच हाती लागली नाही. त्यानंतर नवऱ्या मुलाच्या कुटुंबाने नवरीविरोधात तक्रार केली. ‘नवरी मुलीने तिचे ५ लाख रुपयांचे दागिने घातले होते ते घेऊन ती पसार झाली आहे’, अशी तक्रार नवऱ्या मुलाच्या वडिलांनी बिवार पोलिस ठाण्यात दाखल केली आहे.
चौकशीदरम्यान, नवरीने तिच्या सासरच्या लोकांवर कमी हुंडा आणल्याबद्दल टोमणे मारण्याचा आणि मारहाण केली असल्याचा आरोप केला. त्यानंतर पोलिसांनी वधूला तिच्या मोठ्या बहिणीकडे सोपवले. या प्रकरणी आता पोलिस स्टेशनचे प्रभारी राजेश कुमार पांडे यांच्या म्हणण्यानुसार, त्यांनी आरोपी मेहुण्याशी फोनवर बोलले आणि त्यांना पोलिस स्टेशनमध्ये हजर राहण्यास सांगितले. दोन्ही पक्षांना एकत्र बसवून संपूर्ण प्रकरणाची चौकशी केली जाईल.
महत्वाच्या बातम्या
-‘सासूनं केली काळी जादू, नवऱ्यानं दाखवले अश्लील व्हिडीओ’; फरार हगवणेंना मदत करणारे ‘ते’ दोघे कोण?
-महिला आयोगाचे दोन्ही नंबर ‘नॉट एक्झिस्ट’?, मनसेचं थेट मुख्यमंत्र्यांना पत्र, पत्रातून ‘ही’ मागणी
