पुणे : भाजपचे माजी खासदार संजय काकडे यांच्याविरोधात अजामीनपात्र अटक वॉरंट काढण्यात आले आहे. सदनिका बुक केल्यानंतर कंपनीने ना करार केला, ना बांधकाम सुरु केले. त्यामुळे बुकिंगसाठी दिलेली रक्कम ९ टक्के व्याजासह परत करावी, असा आदेश राष्ट्रीय ग्राहक तक्रार निवारण आयोगाने दिले होते. या आदेशाची पूर्तता न केल्याप्रकरणी संजय काकडे यांच्याविरोधात अजामीनपात्र अटक वॉरंट काढण्यात आले आहे. राष्ट्रीय ग्राहक तक्रार निवारण आयोगाचे अध्यक्ष राम सूरत राम मौर्य आणि सदस्य भरतकुमार पांडे यांनी हा निकाल दिला आहे.
कोथरुड येथील अनघा आंबेतकर यांनी याबाबत ‘काकडे कन्स्ट्रक्शन कंपनी प्रायव्हेट लिमिटेड’ विरोधात तक्रार दिली होती. अनघा यांच्या तक्रारीवरुन काकडे यांच्या कोथरुड बाग या गृहप्रकल्पामध्ये २०१५ मध्ये निवासी सदनिका बुक केली होती. ९९ लाख ७३ हजार रुपये किमतीच्या या सदनिकेसाठी त्यांनी १० नोव्हेंबर २०१५ पासून कंपनीला वेळोवेळी रुपये २१ लाख ३४ हजार ८१ रुपये दिले होते.
सदनिकेच्या खरेदीबाबत कंपनीने त्यांच्याशी करार केला नाही. तसेच ठरल्याप्रमाणे बांधकामदेखील सुरू केले नाही. त्यामुळे आंबेतकर यांनी जून २०१७ मध्ये बुकिंग रद्द करीत पैसे परत देण्याची मागणी केली. त्यानुसार कंपनीने त्यावेळी त्यांना ५ लाख रुपये परत केले. मात्र, उर्वरित रक्कम मिळण्यासाठी तक्रारदार यांनी आयोगात अर्ज केला होता. त्या अर्जावर सुनावणी होत तक्रारदार यांचे १६ लाख ३४ हजार ८१ रुपये बुकिंग केल्याच्या तारखेपासून ९ टक्के व्याजाने परत करावेत. तक्रार खर्चापोटी ५० हजार रुपये द्यावेत, असा आदेश फेब्रुवारी २०२३ मध्ये राष्ट्रीय ग्राहक तक्रार निवारण आयोगाने दिला होता.
महत्वाच्या बातम्या-
-अजित पवार नॉट रिचेबल असल्याच्या चर्चेला पूर्णविराम; अजितदादांची प्रकृती बिघडली
-Pune | उरुळी देवाची अन् फुरसुंगीत ८४ अनधिकृत होर्डिंग; गावकऱ्यांच्या सुरक्षिततेचा प्रश्न ऐरणीवर
-पुण्याहून थेट कर्नाटकच्या कत्तलखान्यात उंटांची तस्करी; पुणे पोलिसांकडून ८ उंटांना जीवदान
-पीएमआरडीएकडे अनधिकृत होर्डिंग हटवण्यासाठी निविदा; कारवाईसाठी पहावी लागणार वाट
