पुणे : संपूर्ण राज्याला हादरुन सोडणारे पुण्यातील स्वारगेट लैंगिक अत्याचार प्रकरणातील आरोपी दत्तात्रेय गाडे याला जामीन मिळाल्यास आपल्या जीवाला गंभीर धोका निर्माण होईल, अशी भीती पीडित तरुणीने गुरुवारी न्यायालयात व्यक्त केली आहे. आरोपीने यापूर्वी पीडितेची प्रतिमा मलीन करण्याचा प्रयत्न केला असून, त्याची पुनरावृत्ती होऊ शकते, असे तिच्या वकिलांनी न्यायालयाला सांगितले आहे. पीडितेच्या संरक्षणासाठी कोणतीही योजना सादर करण्यात आलेली नाही, असेही वकिलांनी नमूद केले.
25 फेब्रुवारी 2025 रोजी पहाटे साडेपाच वाजण्याच्या सुमारास पुण्यातील स्वारगेट एसटी बस आगारातील शिवशाही बसमध्ये आरोपी दत्तात्रेय रामदास गाडे (वय 37, रा. गुनाट, शिरुर) याने एका तरुणीवर दोन वेळा अत्याचार केल्याची घटना घडली. या प्रकरणी स्वारगेट पोलिस ठाण्यात गुन्हा दाखल करण्यात आला असून, 893 पानांचे आरोपपत्र पुणे न्यायालयात सादर करण्यात आले आहे. आरोपीने ॲड. वाजेद खान बीडकर यांच्यामार्फत जामिनासाठी अर्ज केला आहे.
युक्तीवाद नेमका काय?
बचाव पक्षाने युक्तिवाद केला की, आरोपी आणि पीडितेमध्ये सहमतीने संबंध प्रस्थापित झाले होते आणि असा कोणताही गुन्हा घडला नाही. तसेच, आरोपीवरील पूर्वीचे गुन्हे हे लैंगिक अत्याचाराचे नसून, चोरी आणि दरोड्याशी संबंधित आहेत, असे बचाव पक्षाने न्यायालयात सांगितले. सरकार वकील आणि पीडितेच्या वकिलांनी युक्तिवाद केला की, आरोपीला जामिनावर सोडल्यास पीडितेच्या जीविताला धोका निर्माण होईल. या जामीन अर्जावर आज, शुक्रवार, 27 जून 2025 रोजी न्यायालयाचा निर्णय अपेक्षित आहे.
महत्वाच्या बातम्या
-‘ठाकरे इज द ब्रँड’ ट्वीट करत राऊतांनी भाजपला डिवचलं, थेट अमित शहा, फडणवीसांना केलं टॅग
-अमोल मिटकरींच्या ‘त्या’ भावनेला सुनेत्रा पवारांनी दिलं उत्तर; म्हणाल्या, ‘माऊली नक्कीच…’
-मॅट्रिमोनियल साइटद्वारे ३.६० कोटींची फसवणूक; ऑस्ट्रेलियन नागरिकाला अटक
-मंत्र्यांनाच माहित नाही पदाधिकाऱ्यांचे कांड; विचारल्यावर म्हणतात, त्याने काय केलं?
