पुणे : पुण्याच्या राजकारणातील एक महत्वाचे नेते आणि माजी उपमहापौर उल्हास ऊर्फ आबा बागुल यांनी आज शिंदेंच्या शिवसेनेमध्ये प्रवेश केला आहे. या पक्षप्रवेशाने महाविकास आघाडीच्या पालिका निवडणुकीची समीकरणे बदलण्याची शक्यता आहे. काँग्रेसशी ४० वर्षे निष्ठा राखलेल्या आबा बागुलांनी आज शिंदेसेनेचे धनुष्यबाण हाती घेतल्याने सर्वांनाच आश्चर्याचा धक्का बसला आहे. गेल्या काही दिवसांपासून आबा बागूल हे भाजपमध्ये प्रवेश करणार असल्याची चिन्हे दिसत होती. मात्र, त्यांनी अचानक शिवसेनेत प्रवेश करत गुगली फेकली आहे.
आबा बागुल हे प्रभाग रचना बदलून देखील सलग ६ वेळा नगरसेवक म्हणून विजयी झाले. विधानसभा निवडणूक २०२४ मध्ये आबा बागुल यांना पर्वती विधानसभा मतदारसंघातून उमेदवारी नाकारण्यात आली. ज्येष्ठ नेते शरद पवारांच्या राष्ट्रवादी काँग्रेसकडे पर्वतीची जागा असल्यामुळे आबा बागुलांना या ठिकाणाहून संधी मिळाली नाही. यावेळी त्यांनी काँग्रेससोबत बंडखोरी करत अपक्ष निवडणूक लढवली. त्यांच्यासह महाविकास आघाडीच्या उमेदवाराचा देखील परभव झाला. त्यानंतर आता आबा बागुल हे भाजपमध्ये प्रवेश करणार असल्याच्या चर्चा रंगल्या होत्या. नवरात्रोत्सवामध्ये भाजपचे नेते, महसूल मंत्री चंद्रशेखर बावनकुळे यांनी देखील त्यांची भेट घेतली होती. यावरुन देखील बागुल भाजपमध्ये जाणार असल्याच्या चर्चेवर जवळपास शिक्कामोर्तब झालं होते. मात्र आता आबा बागुलांनी शिवसेनेच्या शिंदे गटात प्रवेश करत जोरदार गुगली टाकल्याचं पहायला मिळात आहे.
आबा बागुल यांची राजकारणात एन्ट्री
१९९२ साली नागरिकांच्या आग्रहास्तव अपक्ष म्हणून पहिल्यांदा निवडून आल्यानंतर १९९२ ते २०२२ पर्यंत ते सलग ३० वर्षे नगरसेवक राहिले. त्यांचे बंधू कै. अरविंद बागुल यांनी शिवसेनेकडून निवडणूक लढवली होती, पण पराभूत झाले होते.
कोणती पदे सांभाळली?
आबा बागुल यांनी अनेक महत्त्वाची पदे भूषवली. १९९७ साली महापालिकेच्या स्थायी समितीचे अध्यक्ष, २००७ ते २०१२ पर्यंत काँग्रेसचे गटनेते, २००८ ते २०१२ पर्यंत विरोधी पक्षनेते, २०१५ ते २०१७ पर्यंत उपमहापौर आणि २०२० पासून पुन्हा काँग्रेसचे गटनेते अशी पदे त्यांनी सांभाळली.
ऐन महापालिका निवडणुकीच्या तोंडावर आबा बागुल यांनी शिंदेसेनेत प्रवेश केल्याने आता कॉग्रेसला मोठा धक्का बसला असून पालिका निवडणुकीत या पक्षप्रवेशाचे परिणाम दिसून येणार आहेत.
महत्वाच्या बातम्या-
-ऐन निवडणुकीच्या तोंडावर शरद पवारांना मोठा धक्का; विश्वासू नेत्याने घेतला राजकारणातून संन्यास?
