पुणे : पुण्यातील वैष्णवी हगवणे प्रकरणातील अटकेत असणाऱ्या शशांक आणि सुशील हगवणे बंधूंच्या अडचणी वाढण्याची शक्यता आहे. त्यांच्याकडे असलेल्या पिस्तूल परवान्याच्या चौकशीला सुरुवात झाली असून पुणे पोलिस आयुक्तालयामार्फत मिळालेल्या या परवान्यांसाठी हगवणे बंधूंनी पुण्यात राहत असल्याचा दावा केला होता. मात्र, त्यांनी दिलेल्या पत्त्याची तपासणी केल्यानंतर काही अनियमितता आढळल्यास त्यांच्यावर गुन्हे दाखल होऊ शकतात. विशेष म्हणजे, शशांक, सुशील आणि नीलेश चव्हाण या तिघांना एकाच दिवशी पिस्तूल परवाने मिळाले होते, ज्यामुळे या प्रकरणाची सखोल चौकशी करण्याचे आदेश देण्यात आले आहेत.
हगवणे कुटुंब मूळचे भूकुम येथील असून, सध्या ते बावधन परिसरात राहतात. त्यांचा कायमस्वरूपी पत्ता पौड पोलिस ठाण्याच्या हद्दीत आहे. तरीही, त्यांनी पुणे शहरात राहत असल्याचे भाडेकरारासह पुरावे सादर करून पिस्तूल परवाने मिळवले. याचप्रमाणे, नीलेश चव्हाण यानेही असाच परवाना घेतला. या तिघांनी वारजे आणि कोथरूड पोलिस ठाण्यांच्या हद्दीत अर्ज करून परवाने मिळवले. प्राथमिक चौकशीत असे दिसून आले आहे की, त्यांनी पुणे पोलिस आयुक्तालयाला चुकीची माहिती दिली असावी. यामुळे, एकाच घरातील दोन बंधूंना एकाच वेळी सुरक्षेसाठी पिस्तूल परवान्याची गरज का भासली? हा प्रश्न उपस्थित झाला आहे.
2022 मध्ये शशांक, सुशील आणि नीलेश चव्हाण यांना एकाच वेळी पिस्तूल परवाने देण्यात आले. याप्रकरणी पौड पोलिस ठाण्याच्या हद्दीत राहत असतानाही त्यांनी पुणे पोलिस आयुक्तालयातून परवाने कसे मिळवले, याची चौकशी सुरू आहे. या प्रकरणात हगवणे बंधूंच्या एका नातेवाइकाची भूमिका संशयास्पद आहे, जो त्या वेळी पुणे पोलिस दलात कार्यरत होता. त्यामुळे परवाना मंजुरी प्रक्रियेत राजकीय किंवा प्रशासकीय दबाव होता का, याचा तपास केला जाणार आहे. संबंधित आयपीएस अधिकाऱ्यांच्या निर्णय प्रक्रियेचीही छाननी होणार असून, यामध्ये काही गैरप्रकार आढळल्यास कायदेशीर कारवाई होऊ शकते.
महत्वाच्या बातम्या
-20 वर्षांचा संसार क्षणात मोडला; पुण्यात एकाच दिवसात घटस्फोटाचा दावा मंजूर
-ऐकावं ते नवलंच! लग्नाच्या रात्री पत्नीसाठी पान आणायला गेला अन् आल्यावर पाहिलं तर पत्नी…
-‘सासूनं केली काळी जादू, नवऱ्यानं दाखवले अश्लील व्हिडीओ’; फरार हगवणेंना मदत करणारे ‘ते’ दोघे कोण?
-महिला आयोगाचे दोन्ही नंबर ‘नॉट एक्झिस्ट’?, मनसेचं थेट मुख्यमंत्र्यांना पत्र, पत्रातून ‘ही’ मागणी
