पुणे : नाशिकच्या अशोक खरात प्रकरणाची चर्चा असतानाच पुणे जिल्ह्यातून आणखी एक संतापजनक घटना समोर आली आहे. कौटुंबिक वादात तोडगा काढण्याचे आणि नोकरीचे आमिष दाखवून एका ४२ वर्षीय महिलेवर वारंवार लैंगिक अत्याचार करण्यात आल्याची धक्कादायक घटना उघडकीस आली आहे. या प्रकरणी भोंदू औदुंबर मनोहर गडदे (वय ४३, रा. तरटगाव, पंढरपूर) याला स्वारगेट पोलिसांनी अटक केली आहे. आरोपीने महिलेकडून तब्बल ५० लाख ५५ हजार रुपयांची आर्थिक लूट केल्याचेही तपासात समोर आले आहे.
पोलिसांच्या माहितीनुसार, पीडित महिला आणि तिचे पती कौटुंबिक वादामुळे वेगळे राहत होते. पाच वर्षांपूर्वी महिलेची भेट गडदे याच्याशी झाली. स्वतःला ‘देवऋषी’ म्हणवून गडदे याने महिलेला जाळ्यात ओढले. स्वारगेट परिसरातील एका लॉजवर बोलावून त्याने प्रथम अत्याचार केला. त्यानंतर लोणेरे, उत्तेखोल आणि माणगाव या ठिकाणी नेूनही वेळोवेळी लैंगिक शोषण केल्याचे समोर आले.
केवळ शारीरिक अत्याचारच नव्हे, तर आर्थिक लूटही केली. आरोपीने बांधकाम व्यवसायात गुंतवणूक केल्यास मोठा परतावा मिळेल असे आमिष दाखवले. मे २०२१ पासून रोख रक्कम आणि दागिन्यांच्या स्वरूपात एकूण ५० लाख ५५ हजार रुपये उकळले. आपली फसवणूक आणि शोषण होत असल्याचे लक्षात आल्यानंतर महिलेने ११ एप्रिल रोजी स्वारगेट पोलीस ठाण्यात तक्रार दाखल केली.
या प्रकरणी स्वारगेट पोलिसांनी गडदेविरुद्ध फसवणूक, बलात्कार आणि इतर कलमांनुसार गुन्हा दाखल केला आहे. खरात प्रकरणानंतर पुण्यातही अशा भोंदूबाबांच्या जाळ्यात महिलांना अडकवण्याचे प्रकार सुरू असल्याचे समोर आले आहे. पोलिस तपास सुरू असून, आरोपीच्या इतर गुन्ह्यांचाही शोध घेतला जात आहे.
महत्वाच्या बातम्या-
-पुण्यात प्राचार्याला ‘पॉक्सो’ धमकी देणाऱ्या रिलस्टार सोनाली हिंगेसह तिघे निलंबित
-नांदेड सिटीतील विद्या प्रतिष्ठान स्कूलमध्ये लाखोंचा आर्थिक अपहार; प्रशासकीय अधिकाऱ्यावर गुन्हा दाखल
