पुण्यात अनधिकृत आरएमसी प्लॅंटमुळे नागरिक हैराण, खासदार मेधा कुलकर्णींकडून जागेवर पाहणी; वडगाव खुर्द परिसरातील प्लँट हटणार?

पुणे :वडगाव खुर्द परिसरातील आरएमसी (रेडीमिक्स काँक्रीट) प्लांट चालकांकडून नियमांचे सर्रास उल्लंघन केले जात असून, यामुळे प्रदूषण आणि अपघातांची मालिका सुरू आहे. परिसरातील नागरिकांचे आरोग्य धोक्यात आले आहे. या प्लांट्स तातडीने हलवावेत, अशी मागणी खासदार डॉ. प्रा. मेधा कुलकर्णी यांनी महापौर आणि महापालिका आयुक्तांकडे केली आहे.

शनिवारी सिंहगड रस्त्यावरील दत्तकृष्णाई मंगल कार्यालय ते प्रेयेजासिटी, मधुकोष सोसायटी, धायरी लेन १७-अ, फॉर्चुनर सोसायटी या परिसरातील अनधिकृत रेडीमिक्स प्लांट्सची खासदार मेधा कुलकर्णी यांनी प्रत्यक्ष पाहणी केली. प्लांट्समधून होणारे अतिप्रदूषण, रेडिमिक्स वाहून नेणाऱ्या वाहनांमुळे होणारी वाहतूक कोंडी, नियमांचे उल्लंघन अशा अनेक गंभीर बाबी निदर्शनास आल्यानंतर त्यांनी संबंधित अधिकाऱ्यांना बोलावून त्वरित कारवाई करण्याचे आदेश दिले.

या परिसरातील अनधिकृत सिमेंट प्लांट्समुळे हवेत सिमेंटची भुकटी मिसळून रहिवाशांच्या घरात शिरत आहे. त्यामुळे लहान मुले, वृद्ध आणि श्वसनाचे आजार असलेल्या नागरिकांना मोठा त्रास होत आहे. रस्त्यावर पडलेल्या सिमेंटमुळे दुचाकीस्वारांना अपघात होत आहेत. डोळे आणि श्वसनसंस्थेवर होणारा परिणाम वाढला आहे. या भागात प्रयेजा सिटी, प्रयेजा पुरम, आर्यन रेसिडेन्सी, कल्पवृक्ष अशा अनेक सोसायट्या आहेत, ज्यात एक हजारांपेक्षा जास्त नागरिक राहतात.

या रस्त्यावरून नांदेड सिटी, मधुकोष, खडकवासला येथून वारजे-हिंजवडी-मुंबईकडे जाणारी वाहतूक प्रचंड प्रमाणात आहे. त्यात भरधाव वेगाने येणारी आरएमसीची डंपर आणि मिक्सर वाहने नेहमी फोनवर बोलत असतात आणि जोरात गाणी लावतात. यामुळे अपघातांची शक्यता वाढली आहे. यापूर्वी या रस्त्यावर एका महिलेचा आरएमसी वाहनाने चिरडून मृत्यू झाला होता, तरीही कोणतीही ठोस कारवाई झालेली नाही.

खासदार मेधा कुलकर्णी यांनी या सर्व गंभीर बाबींची दखल घेत महापालिका आयुक्तांना त्वरित कारवाई करण्याची विनंती केली. अनधिकृत आरएमसी प्लांट्स बंद करून त्यांचे स्थलांतर करण्यात यावे, नियमभंग करणाऱ्या वाहनांवर दंडात्मक कारवाई करण्यात यावी, अशी मागणी त्यांनी केली. महापालिका प्रशासनाने याबाबत लवकरात लवकर ठोस पावले उचलावीत, असेही त्यांनी स्पष्ट केले.

महत्वाच्या बातम्या-

-पुण्यात प्राचार्याला ‘पॉक्सो’ धमकी देणाऱ्या रिलस्टार सोनाली हिंगेसह तिघे निलंबित

-नांदेड सिटीतील विद्या प्रतिष्ठान स्कूलमध्ये लाखोंचा आर्थिक अपहार; प्रशासकीय अधिकाऱ्यावर गुन्हा दाखल

-कर्करोग उपचार क्षेत्रात बीव्हीजी लाइफ सायन्सेसचे आशादायी संशोधन, ‘संयुग ७’ची प्रभावी कामगिरी – डॉ. श्रीकांत माने

-पासपोर्ट सेवा केंद्रामुळे होणाऱ्या वाहतूक व नागरी समस्यांवर पूर्वतयारी; सनी निम्हण यांच्या पुढाकाराने संयुक्त बैठक संपन्न

-इन्स्टाग्रामवर प्रेम जुळलं, लग्नाचं आमिष अन् १२ पानांचं पत्र लिहून व्यावसायिकानं घेतला मोठा निर्णय