पुणे : पुण्यातील बुधवार पेठेतील वेश्यावस्तीत बेकायदा वास्तव्य करणाऱ्या बांगलादेशी तरुणी प्रकरणात फरासखाना पोलिस ठाण्यातील महिला कर्मचाऱ्याला निलंबित करण्यात आल्यानंतर पोलिस दलाने कठोर कारवाईला सुरुवात केली आहे. बुधवारी मध्यरात्री १२ वाजता शहर पोलीस दलाने मोठे ‘कोम्बिंग ऑपरेशन’ राबवले. स्थानिक पोलिसांसह गुन्हे शाखेच्या विविध युनिट्सचे अधिकारी आणि कर्मचारी यांचा फौजफाटा बुधवार पेठेत दाखल झाला.
या ऑपरेशनमध्ये बुधवार पेठेत येणारे-जाणारे सर्व रस्ते सील करण्यात आले. शुक्रवार पेठ पोलिस चौकीजवळील सर्व कुंटणखान्यांमध्ये महिला पोलिसांनी कसून चौकशी केली. कुंटणखान्यातील महिलांची ओळख, कागदपत्रे आणि त्यांच्या पार्श्वभूमीची तपासणी करण्यात आली. तसेच या परिसरात वावरत असलेल्या तरुणांची झाडाझडती घेण्यात आली. अमली पदार्थ, जबरदस्तीने वेश्याव्यवसाय करायला भाग पाडणे, बांगलादेशी महिलांचे बेकायदा वास्तव्य याबाबत विशेष लक्ष देण्यात आले.
रात्री १२ ते पहाटे ३ वाजेपर्यंत ही कारवाई सुरू होती. या दरम्यान बुधवार पेठेतील ५० कुंटणखान्यांची झडती घेण्यात आली. अल्पवयीन मुलींवर जबरदस्तीने वेश्याव्यवसाय लादला जात आहे का, अमली पदार्थांचा पुरवठा होत आहे का, याचा शोध घेण्यात आला. पोलिसांनी अनेक संशयित व्यक्तींची चौकशी केली असून, काहींना ताब्यात घेऊन अधिक तपास सुरू आहे.
या ऑपरेशनमुळे बुधवार पेठ परिसरात कायदा-सुव्यवस्थेची भीती निर्माण झाली असून, स्थानिक नागरिक आणि व्यावसायिकांमध्ये एक प्रकारचा सकारात्मक संदेश गेला आहे. पोलिसांनी स्पष्ट केले की, अशा प्रकारच्या बेकायदा व्यवहारांना आळा घालण्यासाठी अशा कारवाया नियमितपणे सुरू राहतील. विशेषतः बांगलादेशी नागरिकांच्या बेकायदा वास्तव्याबाबत आणि वेश्याव्यवसायातील जबरदस्तीच्या प्रकरणांवर कठोर कारवाई होत राहील.
या घटनेनंतर पुणे पोलिस दलाने शहरातील संवेदनशील भागांत अशा प्रकारच्या कोम्बिंग ऑपरेशन्स वाढवण्याचा निर्णय घेतला आहे. बुधवार पेठेतील ही कारवाई ही फक्त सुरुवात असून, पोलिस यंत्रणा आता अधिक सजग आणि कठोर भूमिका घेणार असल्याचे संकेत मिळत आहेत.
महत्वाच्या बातम्या-
-पुरंदर विमानतळ प्रकल्पाला राज्य शासनाची मान्यता; पुणे-पश्चिम महाराष्ट्राच्या विकासाला गती मिळेल
-सुनेत्रा पवारच राष्ट्रवादीच्या राष्ट्रीय अध्यक्षा, पुण्यातील नगरसेवकांच्या बैठकीत एकमताने ठराव!
-भाजपकडून स्वीकृत नगरसेवक कोण होणार? चंद्रकांत पाटील स्पष्टचं बोलले, अनेकांचे टेन्शन वाढले
