पुणे : महापालिका निवडणुकीच्या जाहीरनाम्यानंतर राजकीय हालचालींना वेग आला आहे. मुख्यमंत्री देवेंद्र फडणवीस यांनी सोमवारी पुणे आणि पिंपरी-चिंचवडसह बहुतांश ठिकाणी उपमुख्यमंत्री अजित पवारांच्या राष्ट्रवादीला महायुतीमध्ये स्थान नसेल, असे स्पष्ट केले. यानंतर अजित पवारांनीही आपली रणनीती उघड करण्यास सुरुवात केली. त्यांनी पुण्यातील पदाधिकाऱ्यांसह मॅरेथॉन बैठकांचे सत्र सुरू केले.
पुण्यात अजित पवारांनी राष्ट्रवादी काँग्रेस शरदचंद्र पवार पक्षाच्या काही वरिष्ठ नेत्यांना फोन करून भेटण्याचे आमंत्रण दिले. मात्र, या नेत्यांनी काल भेट टाळली. शरद पवार गटातील एक भाग पुण्यात अजित पवारांसोबत जाण्यास अनुकूल नसल्याचे चित्र आहे. यामुळे पुण्यात दोन्ही गटांत तट पडल्यासारखे वाटते. मात्र, पिंपरी-चिंचवडमध्ये चित्र वेगळे आहे. येथे दोन्ही राष्ट्रवादी काँग्रेस गट एकत्र येण्याच्या चर्चा अंतिम टप्प्यात आहेत.
नगरपालिका निवडणुकीत काही ठिकाणी एकत्र लढल्यानंतर पिंपरी-चिंचवड महापालिकेतही युतीची सुरुवात होण्याची शक्यता आहे. दोन्ही पक्षांच्या नेत्यांची पहिलीच बैठक पार पडली. या बैठकीत अजित पवार गटाचे निवडणूक प्रमुख नाना काटे आणि शरद पवार गटाच्या कोअर कमिटी सदस्य सुनील गव्हाणे यांच्यात चर्चा झाली. नाना काटे यांनी खुलासा केला की, खासदार सुप्रिया सुळे यांनी फोन करून मतविभाजन टाळण्यासाठी एकत्र लढण्याचा सल्ला दिला. यावरून पवार कुटुंबातील वरिष्ठ पातळीवरूनच ही युतीची चर्चा सुरू असल्याचे दिसते.
बैठकीत ‘घड्याळ’ की ‘तुतारी’ हे चिन्ह वापरण्याबाबत आणि आघाडी करून आपापल्या चिन्हावर लढण्याबाबत प्राथमिक चर्चा झाली. एकीकडे अजित पवार पुण्यात शरद पवार गटाच्या नेत्यांना बोलावत असताना, दुसरीकडे पिंपरी-चिंचवडमध्ये सुप्रिया सुळे अजित गटाच्या नेत्यांशी संपर्क साधत असल्याचे बोलले जात आहे.
महत्वाच्या बातम्या-
-पुणे महापालिकेत भाजप-राष्ट्रवादीची मैत्रिपुर्ण लढत; फडणवीस-अजितदादांची रणनीती
-कमला नेहरू रुग्णालयाचे रुपडे पालटणार, १३ कोटींची कामे प्रगतीपथावर; आधुनिक सुविधा लवकरच मिळणार
-बोपदेव घाट लॉजवर छापा, बांगलादेशी तरुणींना देहविक्रीला प्रवृत्त करणाऱ्या दोघांना अटक
-‘विश्वास विकास निर्विवाद’ माजी सभागृह नेते गणेश बिडकरांच्या कार्य अहवालाचे प्रकाशन!
