पुणे : पुणे लोकसभा मतदारसंघातून महायुती आणि महाविकास आघाडीकडून आपले उमेदवार जाहीर करण्यात आले आहेत. भाजप आणि महायुतीचे उमेदवार मुरलीधर मोहोळ यांच्या प्रचारासाठी संपूर्ण यंत्रणा कामाला लागली आहे. याच्या उलट चित्र काँग्रेसमध्ये पाहायला मिळत असून पक्षांतर्गत कुरघोडीच्या राजकारणामुळे धंगेकर मात्र हैराण झाल्याच दिसत आहे. आधी उमेदवारी देण्यावरून काँग्रेसमध्ये उफाळून आलेली नाराजीची लाट, त्यानंतर मेळाव्यावेळी रंगलेले नाराजी नाट्य आणि आता पद वाटपावरून सुरू असलेला राडा, या सर्व घडामोडींमुळे उमेदवाराचा प्रचार बाजूलाच राहिला असून पक्षातले वाद मिटवण्यावरच काँग्रेसला कसरत करावी लागत असल्याच दिसत आहे.
पुणे लोकसभा मतदार संघात महायुतीचे उमेदवार मुरलीधर मोहोळ, महाविकास आघाडीचे उमेदवार रवींद्र धंगेकर आणि वंचितचे वसंत मोरे यांच्यात तिरंगी लढत होणार आहे. सर्वांनी प्रचाराला सुरुवात केली आहे. महायुतीचे मोहोळ यांच्या प्रचाराने गती घेतली आहे. महाविकास आघाडीतील आणि कॉंग्रेस पक्षांतर्गत सुंदोपसुंदीने धंगेकरांना ग्रासले आहे. नुकत्याच कॉंग्रेस भवन येथे झालेल्या बैठकीमध्ये सर्वांनी एकदिलाने काम करून रवींद्र धंगेकर यांना निवडून आणण्याच्या आणाभाका घेतल्या. परंतु त्यानंतर दोनच दिवसांत पक्षांतर्गत या कुरघोड्यांची कॉंग्रेस आणि राजकीय वर्तुळात चर्चा रंगली आहे.
झाले असे की, गेल्या तीन वर्षांपासून कॉंग्रेस पक्षाच्या ओबीसी आघाडीचे पुणे शहराध्यक्ष असलेले प्रशांत सुरसे यांची बुधवारी ऐन लोकसभा निवडणुकीच्या तोंडावर शहर व प्रदेश पातळीच्या शिफारसीवरून हकालपट्टी केली गेली आणि त्यांच्या जागेवर प्रदीप परदेशी यांची नियुक्ती करण्यात आली. मात्र, सुरसे यांच्या गटाने थेट दिल्लीतील कॉंग्रेसच्या अखिल भारतीय ओबीसी विभागाचे सरचिटणीस राहुल यादव यांच्याशी संपर्क साधला. त्यांनी तातडीने आदेश काढून सुरसे यांची या पदावर पुनर्नियुक्ति केली.
काही दिवसांपूर्वी महाविकास आघाडीच्या आलेल्या बैठकीत कसबा विधानसभा शिवसेनेला सोडणार, असा शब्द द्या, तरच धंगेकरांचा प्रचार करू अशी भूमिका शिवसेना ठाकरे गटाने घेतली होती. मध्यंतरी केसरीवाडा येथे झालेल्या बैठकीमध्ये ‘ज्यांनी पंतप्रधान नरेंद्र मोदी यांना लोकमान्य टिळक यांच्या नावाचा पुरस्कार दिला, तेच आता मोदीविरोधक म्हणून आमच्याशेजारी बसणार असतील, तर आम्हाला हे मान्य नाही,’ असे सांगून काँग्रेसच्या एका पदाधिकाऱ्याने काढता पाय घेतला होता. तर त्यानंतर झालेल्या बैठकीसाठी लावलेल्या बॅनरवर ‘नेत्याचा’ फोटो टाकला नाही, म्हणून मंडपवाल्याला मारहाण करण्यात आल्याचं समोर आलं होतं. दोन दिवसांपूर्वी धंगेकरांचा प्रचार करू नका, अशा सूचना शिवसेना ठाकरे गटाच्या एका वरिष्ठ नेत्याने दिल्या होत्या. त्यानंतर पुणे लोकसभा महाविकास आघाडीचे काम जोमाने सुरू आहे. शिवसेना प्रचारामध्ये सहभागी आहे, असे जाहीर करण्याची नामुष्की शिवसेना ठाकरे गटाच्या शहराध्यक्षांवर ओढवली होती.
महत्वाच्या बातम्या-
-Baramati Lok Sabha | ‘मूळचा पवार आणि बाहेरुन आलेला पवार…’; अजितदादांना काकांचं खुमासदार शैलीत
-शरद पवारांचा धृतराष्ट्र झालाय! अजितदादांच्या महिला शिलेदाराची सडकून टीका
