पुणे : पुण्यातील विमाननगर परिसरातील ‘द रुट्स स्पा’वर पोलिसांनी रविवारी दुपारी छापा टाकला तेव्हा एक धक्कादायक घटना घडली. पोलिसांच्या कारवाईची चाहूल लागताच स्पा सेंटरमधील एक महिला कर्मचारी आणि व्यवस्थापक यांनी इमारतीच्या दुसऱ्या मजल्यावरून खिडकीतून उडी मारली. या घटनेत महिलेचा जागीच मृत्यू झाला असून, व्यवस्थापक गंभीर जखमी झाला आहे. जखमींना तात्काळ रुग्णालयात दाखल करण्यात आले असून, त्यांच्यावर उपचार सुरू आहेत.
पोलिसांच्या माहितीनुसार, अनैतिक मानवी व्यापार सुरू असल्याच्या तक्रारी मिळाल्यानंतर विमाननगर पोलीस स्टेशनच्या पथकाने दुपारी सुमारे तीन वाजेच्या सुमारास स्पा सेंटरवर कारवाई केली. अटकेच्या भीतीने महिला आणि व्यवस्थापकाने उडी मारली. घटनास्थळी पंचनामा करून पोलिसांनी स्पा सेंटरचे परवाने, कर्मचारी नोंदी आणि आर्थिक व्यवहारांची तपासणी सुरू केली आहे. मृत महिलेची ओळख पटविण्याचे काम सुरू असून, तिच्या मृत्यूची अपघाती मृत्यू म्हणून नोंद करण्यात येत आहे.
या प्रकरणी व्यवस्थापक आणि सेंटरच्या मालकाविरुद्ध अनैतिक मानवी व्यापार प्रतिबंधक कायद्यान्वये गुन्हा दाखल करण्याची प्रक्रिया सुरू आहे. स्पा सेंटरमध्ये अनैतिक व्यवहार सुरू असल्याच्या तक्रारी मिळाल्यानंतर ही कारवाई करण्यात आली. पोलिसांनी सांगितले की, घटनेबाबत स्पा सेंटरचे व्यवस्थापन, कर्मचारी आणि इतर संबंधित व्यक्तींची सखोल चौकशी सुरू आहे.
या घटनेने विमाननगर परिसरात खळबळ उडाली असून, स्पा सेंटरमधील महिलांच्या सुरक्षिततेचा प्रश्न पुन्हा ऐरणीवर आला आहे. पोलिस उपायुक्त सोमय मुंडे यांनी सांगितले की, प्रकरणाचा सखोल तपास सुरू असून, दोषींवर कठोर कारवाई केली जाईल. या घटनेमुळे पुण्यातील स्पा सेंटर आणि त्यातील महिलांच्या कामाच्या परिस्थितीवर पुन्हा एकदा प्रश्नचिन्ह उपस्थित झाले आहे.
महत्वाच्या बातम्या-
-भाजपची एकहाती सत्ता, बिनविरोध निवडणुका आणि बिडकरांची अचूक रणनीती; पुणे महापालिकेत नवा पॅटर्न
-संख्याबळ नसलेल्या काँग्रेसचा मोठा डाव! ‘त्या’ प्रस्तावाने भाजपपुढे पेच? स्थायीची पहिलीच बैठक गाजणार
