पुणे : संख्याबळ कमी असतानाही काँग्रेसने स्थायी समितीत खेळलेल्या राजकीय डावामुळे सत्ताधारी भाजपसमोर पहिल्याच बैठकीत कठीण पेच निर्माण होणार आहे. पुणे महापालिका स्थायी समिती अध्यक्षपदाची निवडणूक सोमवारी पार पडणार असून भाजपचे श्रीनाथ भिमाले यांच्या निवडीची केवळ औपचारिकता बाकी आहे. स्थायी समितीत भाजपचे १२, राष्ट्रवादी काँग्रेसचे ३ आणि काँग्रेसचा केवळ १ सदस्य आहे. काँग्रेसच्या प्रस्तावामुळे अध्यक्ष निवडीनंतर होणारी पहिली बैठक मात्र राजकीयदृष्ट्या गाजणार, अशी चिन्हे आहेत.
काँग्रेसने शहरातील ५०० चौरस फुटांखालील घरांचा मिळकतकर पूर्णपणे माफ करण्याचा ठराव स्थायी समितीकडे सादर केला आहे. त्यामुळे या विषयावर पहिल्याच बैठकीत सत्ताधारी भाजपची भूमिका काय असेल, याकडे सर्वांचे लक्ष लागले आहे. हा प्रस्ताव मंजूर केला तर महापालिकेला सुमारे २५० कोटी रुपयांच्या उत्पन्नावर पाणी सोडावे लागणार आहे. मात्र प्रस्ताव नाकारला, तर निवडणुकीत दिलेले आश्वासन भाजप विसरली, अशी टीका काँग्रेसकडून होण्याची शक्यता नाकारता येत नाही.
दोन दिवसांपूर्वीच आयुक्तांनी प्रस्तावित केलेली पाच टक्के मिळकतकर वाढ फेटाळून भाजपने पुणेकरांवर वाढीव कर लादणार नसल्याचे श्रेय घेतले होते. अशातच काँग्रेसच्या या नव्या प्रस्तावामुळे सत्ताधाऱ्यांची राजकीय कोंडी होण्याची शक्यता आहे. काँग्रेसचे गटनेते रामचंद्र कदम यांनी ५०० चौरस फुटांपर्यंतच्या घरांचा मिळकतकर माफ करावा, असा ठराव देताना वाढती महागाई आणि आर्थिकदृष्ट्या दुर्बल घटकांना दिलासा देण्याची गरज अधोरेखित केली आहे. ५०० चौरस फुटांपर्यंतची घरे प्रामुख्याने मध्यमवर्गीय आणि गरीब कुटुंबांची असल्याचे त्यांनी नमूद केले आहे.
महापालिकेची हद्दवाढ झाल्याने भविष्यात महसुलात वाढ होऊ शकते तसेच करआकारणी न झालेल्या मिळकतींवर कर लावून उत्पन्न वाढवता येईल, असेही त्यांनी ठरावात म्हटले आहे.
सध्या शहरात सुमारे ११ लाख ३० हजार निवासी मिळकती असून त्यापैकी सुमारे ४ लाख ३० हजार मिळकती ५०० चौरस फुटांखालील आहेत. या मिळकतींचा कर माफ केल्यास अंदाजे २५० कोटी रुपयांचे वार्षिक उत्पन्न कमी होणार आहे.
महत्वाच्या बातम्या-
-अपघाताने दिव्यांगत्व आलेल्या अनेक चेहऱ्यांवर चंद्रकांत पाटलांच्या प्रयत्नामुळे पुन्हा उमलले हासू
-शाळेत सोडतो म्हणून गाडीत नेले अन्…; पुण्यात १३ वर्षीय मुलीवर आईच्या मित्राकडून लैंगिक अत्याचार
-भिगवणमध्ये भरदिवसा आई-भावाच्या डोळ्यांत तिखट फेकून तरुणीचे अपहरण, पोलिसांकडून ६ टीम रवाना
-शिवजयंतीनिमित्त शहरातील मुख्य रस्त्यांवरील वाहतूकीत मोठे बदल, कोणते पर्यायी मार्ग असणार?
-युवा खेळाडूंना मिळणार हक्काचे व्यासपीठ, पुण्यात पार पडणार ‘सुपर सनी मंथ’
