पुणे : राज्यात सध्या ग्रामपंचायत निवडणुकीचा धुरळा उडाला असून गावोगावचे निकाल समोर येत आहेत. यातच दौंड तालुक्यातील नांदूर ग्रामपंचायतीच्या निकालाने सर्वांचे लक्ष वेधून घेतले आहे. राज्य महिला आयोगाच्या माजी अध्यक्षा रुपाली चाकणकर यांचे बंधू संतोष बोराटे यांचा या निवडणुकीत दारुण पराभव झाला आहे. अत्यंत चुरशीच्या वाटणाऱ्या या लढतीत मतदारांनी चाकणकर यांच्या भावाला नाकारल्याचे स्पष्ट झाले आहे.
नांदूरच्या सरपंच पदासाठी संतोष बोराटे आणि विशाल नरेंद्र थोरात यांच्यात थेट लढत झाली. दोन्ही बाजूंनी आरोप-प्रत्यारोपांच्या फैरी झाडल्या गेल्याने ही निवडणूक चुरशीची होईल असा अंदाज होता. मात्र, विशाल थोरात यांनी ही निवडणूक एकतर्फी करत बोराटे यांचा ३०४ मतांनी मोठा पराभव केला. थोरात यांना ८३० मते मिळाली, तर संतोष बोराटे यांना अवघ्या ५२६ मतांवर समाधान मानावे लागले.
कौटुंबिक पराभवाच्या धक्क्यासोबतच रुपाली चाकणकर यांना राजकीय आघाडीवरही मोठ्या संकटाचा सामना करावा लागला आहे. नाशिकच्या कॅप्टन अशोक खरात या भोंदूबाबा प्रकरणामुळे चाकणकर वादाच्या भोवऱ्यात सापडल्या होत्या. खरात याच्याशी असलेली जवळीक आणि त्याच्या मंदिराच्या ट्रस्टवर सदस्य म्हणून असलेले नाव, यामुळे त्यांच्यावर सर्व स्तरातून टीकेची झोड उठली होती. अखेर या प्रकरणाने गंभीर वळण घेतल्याने त्यांच्यावर राजीनाम्याची वेळ आली.
राज्यातून उमटलेल्या तीव्र प्रतिक्रियांनंतर मुख्यमंत्री फडणवीस यांनी चाकणकर यांना राजीनामा देण्याचे निर्देश दिले. या आदेशानंतर त्यांनी उपमुख्यमंत्री तथा राष्ट्रवादीच्या अध्यक्षा सुनेत्रा पवार यांची भेट घेऊन राज्य महिला आयोगाच्या अध्यक्षपदाचा आणि महिला प्रदेशाध्यक्षपदाचा राजीनामा सुपूर्द केला. एकाच वेळी भावाचा पराभव आणि स्वतःचे पद गमवावे लागल्याने चाकणकर समर्थकांमध्ये सध्या शांतता पसरली आहे.
महत्वाच्या बातम्या-
-टुरिस्ट व्हिसावर भारतात आले अन् धर्मप्रसार सुरू! पुण्यात ३ अमेरिकन नागरिकांना ‘लीव्ह इंडिया’ नोटीस
-‘नीलम गोऱ्हेंऐवजी अभिजीत बिचुकले विधान परिषदेवर पाठवा’, तृप्ती देसाईंची एकनाथ शिंदेंकडे खास मागणी
