पुणे : पुणे शहरात गुइलिन बॅरी सिंड्रोम या आजाराची रुग्णसंख्या शंभरी पार केली असून आतापर्यंत शहरातील ८० टक्के रुग्ण हे सिंहगड रोडवरील नांदेड गाव भागातील आहेत. नांदेड गाव तसेच आजूबाजूच्या परिसरात नांदेड गावातील एका विहीरातून पाणी पुरवठा होतो. याच विहीरीतील दूषित पाण्यामुळे जीबीएस होत असल्याची शंका होती. त्यामुळे पालिका आयुक्त डॉ. राजेंद्र भोसले यांनी या विहीरीची पाहणी करत या पाण्याचे परिक्षण करण्याचे आदेश दिले होते. जीबीएसच्या वाढत्या प्रादुर्भावाच्या पार्श्वभूमीवर आरोग्यमंत्री प्रकाश आबिटकर यांनी सोमवारी आढावा घेतला. त्यानंतर त्यांनी नांदेड गावातील विहीरीच्या पाण्यामुळेच जीबीएस होत असल्याची कबुली दिली आहे.
आरोग्यमंत्री आबिटकर यांनी देखील नांदेड परिसरातील पाणीपुरवठा करणाऱ्या विहिरीची पाहणी केली. त्यानंतर त्यांनी दीनानाथ मंगेशकर रुग्णालय आणि ससून सर्वोपचार रुग्णालयात दाखल असलेल्या जीबीएस रुग्णांची भेट घेऊन त्यांची विचारपूस केली. यानंतर आरोग्यमंत्र्यांनी सर्व शासकीय यंत्रणांची बैठक घेऊन परिस्थितीचा आढावा घेतला.
नेमकं काय म्हणाले आरोग्य मंत्री?
“गेल्या काही दिवसांपासून पुण्यातील जीबीएसच्या रुग्णांमध्ये वाढ होत आहे. नांदेड परिसरातील विहिरीतून पाणीपुरवठा होत असलेल्या भागात ८० टक्के रुग्ण आढळून आले आहेत. विहिरीवर आच्छादन नसल्याने अथवा अन्य मार्गाने पाणी दूषित झाले असण्याची शक्यता आहे. त्यामुळे विहिरीतील दूषित पाण्यामुळे जीवाणू आणि विषाणूसंसर्ग होऊन त्यातून जीबीएसचे रुग्ण वाढल्याचे निदर्शनास येत आहे. त्यामुळे आमची प्राथमिकता रुग्णसंख्या वाढू न देण्यास आहे. रुग्णांची संख्या वाढू नये, यासाठी उपाययोजना करण्याचे निर्देश सर्व शासकीय यंत्रणांना देण्यात आले आहेत.”
View this post on Instagram
दरम्यान, ‘राज्यातील नागरिकांना पिण्याचे स्वच्छ पाणी मिळण्याची गरज आहे. या दृष्टीने आरोग्य विभागाकडून नियमावली तयार केली जाणार आहे. नागरिकांना स्वच्छ पाणीपुरवठा करण्यासाठी सर्व यंत्रणांसाठी ही नियमावली आहे. यामुळे नागरिकांना भविष्यात दूषित पाणी मिळणार नाही आणि पर्यायाने त्यामुळे होणारे आजारही टाळता येतील’, असेही प्रकाश आबिटकर म्हणाले आहेत.
महत्वाच्या बातम्या-
-Pune: पुण्यात वाढला GBSचा धोका; केंद्राचं पथक पुण्यात दाखल
-अजितदादांच्या विश्वासू नेत्याची मुजोरी; अद्याप अटक नाही, अजित पवार म्हणाले…
-पुण्यात १ रुपयात ड्रेसची ऑफर महागात; महिलांनी लावली रांगच राग, दुकानदार गायब
