पुणे : नवले पूल परिसरातील अपघात रोखण्यासाठी कायमस्वरूपी उपाययोजनांना वेळ लागत असल्याने तात्काळ उपाययोजना अमलात आणण्याचे निर्देश केंद्रीय राज्यमंत्री मुरलीधर मोहोळ यांनी दिले. शनिवारी घेतलेल्या बैठकीत विविध यंत्रणांच्या प्रमुख अधिकाऱ्यांवर जबाबदारी निश्चित करण्यात आली. मुख्यमंत्री देवेंद्र फडणवीस आणि उपमुख्यमंत्री अजित पवार यांच्या सूचनांनुसार जांभूळवाडी ते वडगाव पर्यंत उपाययोजना केल्या जाणार आहेत. डिसेंबरमध्ये या कामांचा आढावा घेतला जाईल.
बैठकीला आमदार भीमराव तापकीर, महापालिका आयुक्त नवलकिशोर राम, पोलीस आयुक्त अमितेश कुमार, पीएमआरडीए आयुक्त योगेश म्हसे, पोलीस अधीक्षक संदीपसिंग गिल, राष्ट्रीय महामार्ग प्राधिकरणाचे संजय कदम आदी उपस्थित होते. जिल्हाधिकाऱ्यांच्या रस्ता सुरक्षा समितीची नियमित बैठक घेणे, सेवा रस्त्यांचे रखडलेले काम पूर्ण करणे आणि वडगाव पुलाचे रुंदीकरण तात्काळ सुरू करणे, असे निर्देश मोहोळ यांनी दिले.
कायमस्वरूपी उपाय म्हणून जांभूळवाडी ते वारजे रिंग रोड आणि जांभूळवाडी ते रावेत उन्नत मार्ग प्रस्तावित आहे. पीएमआरडीएने रिंग रोडचा डीपीआर तयार करत असून, त्याला गती देण्याचे सांगितले. उन्नत कॉरिडॉरचा डीपीआर पूर्ण झाला असून, तो लवकरच मंत्रीमंडळासमोर मान्यतेसाठी सादर केला जाईल, असे मोहोळ म्हणाले.
तात्काळ उपाययोजनांत स्पीड गन्सची संख्या तीनवरून सहा करणे, वेगमर्यादा ६० ऐवजी ३० किमी करणे, रिफ्लेक्टर्स वाढवणे, पीएमपीला अधिकृत बसथांबे उभारणे आणि सर्व यंत्रणांना सेवा रस्त्यावरील अतिक्रमणे काढण्याचे निर्देश देण्यात आले. या बैठकीच्या इतिवृत्तानुसार कामांचा पाठपुरावा केला जाईल, असे मोहोळ यांनी स्पष्ट केले.
या उपाययोजना होणार
स्पीड गन्सची संख्या तीनऐवजी सहापर्यंत वाढवावी.
– वाहनांची वेगमर्यादा प्रतितास ६० ऐवजी ३० किमी करावी.
– रस्त्यावरील रिफ्लेक्टर्सची संख्या वाढवावी.
– पीएमपीने अधिकृत बसथांबे उभारावेत.
– सर्व यंत्रणांनी आपापल्या हद्दीतील सेवारस्त्यांवरील अतिक्रमणे त्वरित काढून घ्यावीत.
महत्वाच्या बातम्या-
-शरद पवारांच्या राष्ट्रवादीत इच्छुकांची झुंबड; पहिल्याच दिवशी उमेदवारी अर्ज संपले
-मावळमधील कट्टर विरोधकांचं लोणावळ्यात जमलं; वडगावमध्ये फिस्कटलं, राष्ट्रवादीकडून कोणाला उमेदवारी?
-एक फोन अन् फडणवीस मदतीला धावले! जगदीश मुळीकांची ‘देवाभाऊं’बद्दल भावनिक पोस्ट
