पुणे : आगामी महापालिका निवडणुकीत दोन्ही राष्ट्रवादी काँग्रेस गटांची (शरद पवार आणि अजित पवार) पुण्यात आघाडी होण्याच्या चर्चा अंतिम टप्प्यात असतानाच मोठा धक्का बसला आहे. राष्ट्रवादी काँग्रेस (शरद पवार गट) चे शहराध्यक्ष प्रशांत जगताप यांनी पक्षाच्या पदाचा आणि सदस्यत्वाचा राजीनामा दिला आहे. युतीला त्यांचा ठाम विरोध असल्याने हा निर्णय अपेक्षित होता.
नगरपालिका निवडणुकीत काही ठिकाणी दोन्ही गट एकत्र लढले होते. महापालिकेसाठीही खासदार सुप्रिया सुळे आणि अजित पवार यांच्या पातळीवर सकारात्मक चर्चा झाल्या. युतीसाठी शरद पवार गटाकडून वंदना चव्हाण, अंकुश काकडे आणि विशाल तांबे यांची समिती स्थापन झाली; मात्र प्रशांत जगतापांना या समितीत स्थान न दिल्याने त्यांचा संताप वाढला.
जगतापांनी यापूर्वीच “दोन्ही राष्ट्रवादी एकत्र आल्यास राजकारणातून काही काळ विश्रांती घेईन” असा इशारा दिला होता. महाविकास आघाडीतच राहण्याचा त्यांचा आग्रह होता. आता त्यांनी समर्थक कार्यकर्त्यांसोबत बैठक घेऊन राजीनामा घेतला असून, तो सुप्रिया सुळे यांच्याकडे सुपूर्द केल्याची माहिती सूत्रांकडून मिळाली आहे.
राजीनामा स्वीकारल्यानंतर जगताप ठाकरे सेना किंवा काँग्रेसमध्ये जाण्याची शक्यता वर्तवली जात आहे. या पक्षांतून ते महापालिका निवडणूक लढवू शकतात. जगतापांशी संपर्क साधण्याचा प्रयत्न अयशस्वी ठरला. या घडामोडींमुळे पुण्यातील महाविकास आघाडीच्या राजकारणात नवे वळण आले आहे.
महत्वाच्या बातम्या-
-भाजपची ‘दोस्तीत कुस्ती’, अजितदादांचे आमदार अण्णा बनसोडेंच्या मुलाला दिली ऑफर
-‘पार्थ पवार दोषीच, अजित पवार संत नाहीत’, जमीन घोटाळ्या प्रकरणी विजय कुंभार-अंजली दमानियांचा दावा!
-पुण्यात अजितदादांची ‘पॉवर’, भाजपच्या ‘ऑपरेशन लोटस’ला मोठा झटका
-रायफल शूटिंगमध्ये अप्रतिम आशिष ढेंगे यांची राष्ट्रीय स्पर्धेसाठी निवड
