पुणे : राज्यात स्थानिक स्वराज्य संस्थांच्या निवडणुकांचे बिगुल मंगळवारी वाजले. निवडणुकांची घोषणा होताच अवघ्या २४ तासांत शरद पवार यांच्या राष्ट्रवादी काँग्रेसला पुण्यात मोठा धक्का बसला. आचारसंहिता लागू झाल्यावर बड्या नेत्याने पवारांची साथ सोडून धनुष्यबाण हाती घेण्याचा निर्णय घेतला आहे.
उत्तर पुण्यात ताकदवान देशमुख कुटुंब शिंदेंच्या शिवसेनेत प्रवेश करणार आहे. गुरुवारी चाकण येथील शिवसेना मेळाव्यात हा पक्षप्रवेश होईल, अशी माहिती आहे. विधानसभा निवडणुकीनंतर राष्ट्रवादीला सातत्याने धक्के बसत असून, आता स्थानिक स्वराज्य संस्थांच्या निवडणुकीत शरद पवारांसमोर मोठे आव्हान उभे राहिले आहे.
उत्तर पुणे जिल्ह्यात राष्ट्रवादीला निवडणुकीच्या तोंडावर मोठे खिंडार पडले आहे. अतुल देशमुखांसह नगरसेवक आणि हजारो कार्यकर्ते शिंदे शिवसेनेत सामील होणार आहेत. खेड तालुक्यात मजबूत पकड असलेले अतुल देशमुख एक वर्षापूर्वी राष्ट्रवादीत आले होते; मात्र पक्षांतर्गत मतभेद आणि स्थानिक समीकरणांमुळे त्यांनी हा निर्णय घेतला. चाकण, राजगुरुनगर आणि आळंदी नगरपालिकेतील नगरसेवक, पंचायत समिती सदस्यांसह कार्यकर्तेही त्यांच्यासोबत धनुष्यबाण स्वीकारतील. यामुळे शिंदे शिवसेनेला उत्तर पुण्यात बळ मिळेल, तर राष्ट्रवादीला निवडणुकीपूर्वीच नुकसान सोसावे लागेल.
निवडणुकीच्या तोंडावर शरद पवारांच्या राष्ट्रवादीला एकापाठोपाठ धक्का बसला आहे. विधानसभा निवडणुकीनंतर पुण्यासह राज्यभरात कार्यकर्ते, पदाधिकारी आणि दिग्गज नेते पक्ष सोडून जात आहेत. यापूर्वी ठाण्यातील सात माजी राष्ट्रवादी नगरसेवकांनी शिंदे शिवसेनेत प्रवेश केला होता, तर आता अतुल देशमुखांसारख्या स्थानिक नेत्याचा निर्णय पवारांसाठी मोठा धक्का आहे.
विशेषतः अमोल कोल्हे यांचे खंदे समर्थक असलेले अतुल देशमुख हे स्थानिक निवडणुकांसाठी उमेदवारीची तयारी करत होते. आचारसंहिता लागू होताच २४ तासांच्या आत हा निर्णय घेण्यात आल्याने होऊ घातलेल्या निवडणुकीच्या पार्श्वभूमीवर शरद पवारांच्या राष्ट्रवादीला मोठा धक्का मानला आहे.
महत्वाच्या बातम्या-
-पुण्यात पुन्हा आंदेकर-कोमकर गँगवॉर; गुन्हेगारीला लगाम घालण्यात पोलीस अपयशी
-शहरात उभारले जाणार नवीन एसटीपी प्रकल्प, स्थायीने दिली १ हजार २२३ कोटींच्या निविदेला मंजुरी
-फडणवीसांची मध्यस्थी अन् मोहोळ घेणार माघार? अजितदादा लावणार मास्टर स्ट्रोक
-बीव्हीजी आणि ‘आम्ही पुणेकर’ संस्थेची भारतीय जवानांसोबत दिवाळी
