पुणे : महाराष्ट्र ऑलिम्पिक असोसिएशनच्या निवडणुकीत महायुतीतील मित्रपक्ष एकमेकांच्या विरुद्ध उभे राहिले होते. एकीकडे उपमुख्यमंत्री अजित पवार तर दुसरीकडे केंद्रीय मंत्री मुरलीधर मोहोळ हे निवडणूक मैदानात आमनेसामने येणार होते. मात्र, मुख्यमंत्री देवेंद्र फडणवीस यांच्या हस्तक्षेपामुळे या निवडणुकीत आता मोठा ट्विस्ट घडला आहे. उद्या रविवार, २ नोव्हेंबर रोजी होणाऱ्या या निवडणुकीत दोघांमधील थेट लढत टाळण्यासाठी मोहोळ यांनी माघार घेण्याचा निर्णय घेतला आहे.
शुक्रवारी रात्री झालेल्या महत्त्वपूर्ण बैठकीत दोन्ही गटांच्या वरिष्ठ नेत्यांमधील चर्चेनंतर हा निर्णय झाला, अशी माहिती सूत्रांनी दिली. मुरलीधर मोहोळ हे आज शनिवारी मुख्यमंत्री फडणवीस यांची भेट घेणार असून, या भेटीनंतर अंतिम निर्णय जाहीर होण्याची शक्यता आहे. मोहोळ यांनी सुरुवातीला एमओएच्या सचिवांवर भ्रष्टाचाराचे गंभीर आरोप करत निवडणुकीत उडी घेतली होती. त्यांनी अजित पवार यांना सचिवांच्या गैरप्रकारांकडे लक्ष देण्याची विनंती करत, तसे झाल्यास निवडणूक लढण्याची गरज नाही, असेही स्पष्ट केले होते.
भाजप आमदारांनी अजित पवार यांच्या पक्षाच्या क्रीडामंत्र्यांवर भ्रष्टाचारांना आश्रय देण्याचे आरोप करत त्यांचा राजीनामा मागितला होता. यावर प्रतिक्रिया देत अजित पवारांनी मोहोळ यांना चांगलेच खडसावले होते. या राजकीय तणावपूर्ण वातावरणात आता दोन्ही बाजूंमधील वाद मिटवण्यासाठी फडणवीस यांचा हस्तक्षेप निर्णायक ठरला आहे. मोहोळ यांच्या माघारीमुळे निवडणूक प्रक्रिया शांततेने पार पडण्याची अपेक्षा आहे.
महत्वाच्या बातम्या-
-बीव्हीजी आणि ‘आम्ही पुणेकर’ संस्थेची भारतीय जवानांसोबत दिवाळी
-मुरलीधर मोहोळांचे महाराष्ट्र ऑलिम्पिक असोसिएशनवर आरोप फेटाळले; अजित पवार म्हणाले…
-‘मला आई बनवा अन् २५ लाख रुपये मिळवा!’ कॉन्ट्रॅक्टरने जाहिरात वाचली अन्…
